Аввалин хуруҷи вируси марговари Марбург дар Гвинеяи Экваториалӣ ба қайд гирифта шудааст

ДУШАНБЕ, 15.02.2023 /АМИТ «Ховар»/. Аввалин хуруҷи вируси Марбург дар таърих дар Гвинеяи Экваториалӣ ба қайд гирифта шуд, хабар медиҳад Казинформ бо истинод ба Reuters.

13 феврал мақомоти ин давлат аз хуруҷи нахустин бемории шадиди гузаранда аз ҳамон оилаи вирусҳое, ки боиси сар задани табларзаи Эбола мешаванд, хабар доданд. Ба вируси Марбург оқибатҳои марговар хос аст.

Тахмин меравад, ки аллакай 9 нафар аз ин вирус дар ғарби кишвар дар музофоти Киентем фавтидаанд. Санҷишҳои пешакӣ гирифташуда ва ба Институти Пастер дар Сенегал фиристода барои табларзаи вирусии геморрагикӣ натиҷаи мусбат додаанд.

Ташкилоти Умумиҷаҳонии Тандурустӣ (ТУТ) хабар медиҳад, ки ҳоло 16 нафари дигар бо гумони вирус дар карантин қарор доранд. Ҳама аломатҳои хос доранд — табларза, хастагӣ, қайкунӣ бо омехтаи хун. Ташкилоти Умумиҷаҳонии Тандурустӣ як гурӯҳ коршиносонро барои дастгирии кормандони соҳаи тиб ба минтақа фиристод.

Дар музофот ҳаракат миёни ду деҳа, ки дар он ҷо ҳолатҳои зиёди гирифторӣ ба ин беморӣ ба қайд гирифта шудаанд, маҳдуд карда шудааст. Алоқаҳои эҳтимолӣ пайгирӣ карда мешаванд.

Ин аввалин сарзании беморӣ дар мамлакат ва сеюмин дар Африқои Ғарбӣ мебошад. Гана дар бораи чунин як ҳодиса соли гузашта хабар дода буд, Гвинея соле қабл.

Ин вирус ба одам тавассути кӯршапаракҳои мевагӣ мегузарад ва тавассути хун, наҷосат, арақ, оби даҳон ва манӣ байни одамон паҳн мешавад. Дар ҳоле ки ягон ваксина ё табобат мавҷуд нест, ба онҳое, ки гирифтори ин вирус шудаанд, тавсия дода мешавад, ки бештар об нӯшанд.

Хуруҷи қаблии вируси Марбург дар Африқо дар Ангола, Ҷумҳурии Демократии Конго, Кения, Африқои Ҷанубӣ ва Уганда ба қайд гирифта шуда буд.

Мансур СУРУШ,
Ҷаҳонгир ГУЛМУРОДӢ,
АМИТ «Ховар»

АКС: reuters.com