COVID-19. Дар Олмон низоми оммавии ниқобпӯшӣ дар автобус ва қатораҳо бекор карда мешавад

ДУШАНБЕ, 03.02.2023 /АМИТ «Ховар»/. Шурӯъ аз 2 феврал дар саросари Олмон низоми оммавии ниқобпӯшӣ дар нақлиёти ҷамъиятии шаҳрӣ ва қатораҳо бекор карда мешавад. Пас аз се соли пандемияи коронавирус пӯшидани ҳатмии ниқоб дар қатораҳои ба масофаи дур ҳаракаткунанда бекор карда мешавад ва ҳамзамон бо он фармони дахлдор дар нуҳ замини федералӣ дигар эътибор надорад, хабар медиҳад АМИТ «Ховар» бо истинод ба Deutsche Welle.

Ширкатҳои нақлиётӣ вақтҳои охир фаъолона кӯшиш доштанд, ки низоми пӯшидани ниқоб дар нақлиёти ҷамъиятӣ бекор карда шавад ва таъкид мекарданд, ки дар пасманзари вазъи кунунии пандемия ин чора кайҳост, ки дигар зарурат надорад.

Ширкати роҳи оҳани Deutsche Bahn чанд ҳафта пеш аз ҳукумати Олмон даъват кард, ки низоми пӯшидани ниқоб дар қатораҳо ба масофаи дурро ҳарчи зудтар бекор кунад, то ба бесарусомонӣ дар иҷрои қоидаҳо дар заминҳои гуногуни федералӣ ва танзимгарони гуногуни нақлиёт роҳ дода нашавад. Ва ниҳоят ҳукумат тасмим гирифт, ки низоми оммавии ниқоб аз 2 феврал бекор карда шавад. Қаблан бекор кардани он танҳо дар аввали моҳи апрел пешбинӣ шуда буд.

Вазири тандурустии Олмон Карл Лаутербах ба мардум тавсия дод, ки пӯшидани ниқобҳои муҳофизатиро ихтиёран идома диҳанд. Низоми пӯшидани ниқоб дар нақлиёти ҷамъиятии Олмон дар пасманзари пандемия дар аввали соли 2020 тадриҷан ҷорӣ карда шуд. Дар аввал рӯймолу гарданбанд барои мусофирон басанда буд, зеро ниқоб намерасид.

Низоми оммавии ниқоб барои боздидкунандагони беморхонаҳо, хонаҳои маъюбон ва пиронсолон, амалияи тиббӣ то 7 апрел нигоҳ дошта мешавад — онҳо чун пештара вазифадоранд, ки респиратори FFP2 пӯшанд. Барои дастрасӣ ба клиникаҳо ва хонаҳои пиронсолон санҷиши манфии коронавирус низ зарур аст.

АКС: dpa