Дар вилояти Хатлон 30-солагии таъсиси Қувваҳои Мусаллаҳи Ҷумҳурии Тоҷикистон бошукӯҳ таҷлил карда шуд

ДУШАНБЕ, 22.02.2023 /АМИТ «Ховар»/. Имрӯз дар шаҳри Бохтари вилояти Хатлон бахшида ба 30-солагии таъсисёбии Қувваҳои Мусаллаҳи Ҷумҳурии Тоҷикистон бо иштироки афсарону сарбозони қисмҳои низомӣ, собиқадорони хизмати низомӣ ва фаъолони вилоят ҳамоиши тантанавӣ баргузор гардид. Дар ин хусус ба АМИТ «Ховар» дар шуъбаи иттилоотӣ ва таҳлилии дастгоҳи Раиси вилоят иттилоъ доданд.

Гуфта шуд, ки Артиши миллии мо сӣ сол муқаддам дар шароити ниҳоят вазнину ҳассоси иқтисодӣ ва ҳарбиву сиёсии мамлакат, яъне дар рӯзҳое, ки ҷумҳуриро ҷангу хунрезӣ, беқонуниву беҳокимиятӣ ва буҳрони шадиди иқтисодӣ фаро гирифта буд ва ҳамаи сохтору мақомоти давлатӣ фалаҷ гардида буд, аз сифр таъсис дода шуд.

Дар тӯли 30 соли мавҷудият сохторҳо ва ҷузъу томҳои ҳарбии мамлакат ҳамаи мушкилиҳоро бартараф намуда, ба дастовардҳои назаррас ноил гардиданд. Рушди Қувваҳои Мусаллаҳ пояи асосии давлатдорӣ ба ҳисоб рафта, сиёсати пешгирифтаи давлату ҳукумат ба ривоҷу равнақи Қувваҳои Мусаллаҳ, аз ҷумла аз лиҳози таъминнокӣ бо техника ва лавозимоти ҷангӣ, тайёр кардани кадрҳои баландихтисоси аз технологияҳои муосир огоҳ, шароити хуби иҷтимоии сарбозону афсарон ва дигар ҷанбаҳои муҳим равона гардидааст.

Таъкид карда шуд, ки хизмат ба Ватан шарафи бузург ва дар айни замон вазифаи муқаддаси ҳар ҷавони бонангу номус мебошад. Бояд ҷавонони мо хуб дарк намоянд, ки ватандӯстӣ- ин арзи садоқат ба Ватан – Модар ва халқу давлати соҳибистиқлоли худ мебошад.

Дар ҷараёни ҳамоиш ба зиёда аз 40 нафар собиқадорон, афсарон ва сарбозони шуҷои Қувваҳои Мусаллаҳ Ифтихорнома, Сипоснома ва туҳфаҳои хотиравии Мақомоти иҷроияи ҳокимияти давлатии вилояти Хатлон тақдим карда шуд.

АКС: шуъбаи иттилоотӣ ва таҳлилии дастгоҳи Раиси вилояти Хатлон