Донишгоҳи аграрии Тоҷикистон барои бо ҷойи кор таъмин намудани хатмкунандагон бо ҶСП «Шивер-Тоҷикистон» шартнома баст

ДУШАНБЕ, 21.02.2023 /АМИТ «Ховар»/. Донишгоҳи аграрии Тоҷикистон ба номи Шириншоҳ Шоҳтемур ҷиҳати таҷрибаомӯзии истеҳсолӣ ва бо ҷойи кор таъмин намудани хатмкунандагони равияи иқтисодии донишгоҳ бо ҶСП «Шивер-Тоҷикистон» шартномаи дутарафа бастааст. Дар ин хусус ба АМИТ «Ховар» дар донишгоҳ хабар доданд.

Намояндагони ҶСП «Шивер-Тоҷикистон» бо донишҷӯёни курсҳои 2, 3 ва 4-и  Донишгоҳи аграрии Тоҷикистон ба номи Шириншоҳ Шоҳтемур вохӯрӣ намуда, ба онҳо оид ба таърихи пайдоиши ширкат,  кушодашавии брендҳои бонуфузи «Ашан», «bi1» дар Тоҷикистон маълумот доданд.

Гуфта шуд, ки ин ширкати бузурги фаронсавӣ дар тамоми минтақаҳои ҷумҳурӣ корхонаҳои худро таъсис медиҳад. Донишҷӯёни самти иқтисодӣ имкон доранд, ки таҷрибаомӯзии худро дар ин ширкат гузаронида, донишҳои назариявии худро дар амал татбиқ намоянд.

Ширкат фаъолияти пурсамари донишҷӯёнро дида, метавонад дар оянда онҳоро бо ҷойи кор таъмин намояд.

АКС: Донишгоҳи аграрии Тоҷикистон ба номи Шириншоҳ Шоҳтемур