Масъулин бо фаъолияти истгоҳҳои обуҳавосанҷии «Майхура» ва «Ҳушёрӣ» аз наздик шинос шуданд

ДУШАНБЕ,19.02.2023/АМИТ «Ховар»/. Намояндагони Кумитаи ҳифзи муҳити зисти назди Ҳукумати Ҷумҳурии Тоҷикистон,  Бонки ҷаҳонӣ оид ба рушди устувор дар Аврупо ва Осиёи Марказӣ ва дигар масъулон бо фаъолияти истгоҳи обии «Ҳушёрӣ» ва истгоҳи  обуҳавосанҷии «Майхура»-и ноҳияи Варзоб шинос гардиданд. Дар ин хусус  АМИТ «Ховар» бо истинод ба Кумитаи ҳифзи муҳити зисти назди Ҳукумати ҷумҳурӣ иттилоъ медиҳад.

Гуфта шуд, ки соли 2014  дар доираи лоиҳаи Бонки ҷаҳонӣ — «Модернизатсияи хадамоти гидрометеорологии давлатҳои Осиёи Марказӣ» истгоҳи обии «Ҳушёрӣ» ва истгоҳи   обуҳавосанҷии «Майхура» ба реҷаи худкорӣ гузаронида шуда буд.

Бояд тазаккур дод, ки мутахассисони Кумитаи ҳифзи муҳити зист ва  Агентии обуҳавошиносии мамлакат ҳар сол ба қаторкӯҳҳои ҷумҳурӣ  бо мақсади омӯзиши қабати барф, ҳаҷм ва зичии барф дар пиряхҳои асосии Тоҷикистон, парвозҳои аэровизуалӣ ва экспедитсияҳои пиёдагард мегузаронанд, ки маълумоти онҳо дар оянда ҳамчун маводи таҳлилӣ барои пешгӯии сатҳи об ва ҳолатҳои фавқулодаи эҳтимолӣ мусоидат менамояд.

    АКС: Кумитаи ҳифзи муҳити зисти назди Кумитаи ҳифзи муҳити зисти назди Ҳукумати Ҷумҳурии Тоҷикистон