Теъдоди ҳалокшудагони заминларзаҳо дар Туркия ба 31 643 нафар расид

ДУШАНБЕ, 14.02.2023 /АМИТ «Ховар»/. Теъдоди одамони дар натиҷаи заминларзаҳо дар Туркия ҳалокшуда ба 31,6 ҳазор нафар расид. Тавре АМИТ «Ховар» бо истинод ба ТАСС хабар медиҳад, дар ин бора 13 феврал Раёсати ҳукуматӣ оид ба ҳолатҳои фавқулодаи Туркия (AФАД) иттилоъ додааст.

«Ҳоло теъдоди қурбониён ба 31 643 нафар расидааст, 80 278 нафар ҷароҳат бардоштаанд. 6444 бино валангор гардидааст. Дар маҷмӯъ 11 302 маълумотнома дар бораи хисорот дастрас шудааст», — гуфта мешавад дар изҳороти идора.

Раёсати Туркия оид ба ҳолатҳои фавқулода ҳамчунин хабар дод, ки беш аз 206 000 хайма ба минтақаҳои зарардида барои ҷойгиркунии муваққатии осебдидагон оварда шуд, ки 155 000 адади он насб ва истифода шуда истодааст. Дар минтақаи офатрасида қариб 35,5 ҳазор нафар наҷотдиҳандагон ва мутахассисон кор карда истодаанд. Аз 10 музофоте, ки аз офати табиӣ осеб дидаанд, беш аз 150 ҳазор нафар ба минтақаҳои дигар кӯчонида шуданд.

Аз лаҳзаи заминларзаи аввал — соати 4:17-и субҳи 6 феврал беш аз 2,5 ҳазор таконҳои зеризаминии такрорӣ ба қайд гирифта шудаанд.

Ёдовар мешавем, ки рӯзи чаҳорум аст, ки дар шаҳри Қаҳрамонмараш 50 нафар наҷотдиҳандагони Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ба корҳои ҷустуҷӯӣ ва наҷотдиҳӣ машғуланд. Бо талоши онҳо то имрӯз аз зери харобаҳо 109 ҷасад ва се нафари зинда берун оварда шудаанд.

Намояндагони шаҳрдорӣ ва Раёсати Туркия оид ба ҳолатҳои фавқулода ба наҷотдиҳандагони Тоҷикистон барои корашон изҳори сипос карданд.

Мансур СУРУШ,
Ҷаҳонгир ГУЛМУРОДӢ,

АКС аз манбаъҳои боз