ВАО: Теъдоди ҳалокшудагони заминларза дар Туркия қариб ба 30 ҳазор нафар расид

ДУШАНБЕ, 13.02.2023 /АМИТ «Ховар»/. Теъдоди ҳалокшудагони заминларзаи шадид дар ҷанубу шарқи Туркия рӯзи якшанбе ба 29 605 нафар расид. Дар ин бора Раёсати ҳолатҳои фавқулода хабар додааст, хабар медиҳад АМИТ «Ховар» бо истинод ба ТАСС.

«Ҳалокшудагон 29 605 нафаранд. 147 934 нафар шаҳрвандон аз минтақаҳои аз заминларза осебдида ба вилоятҳои дигар кӯчонида шуданд», — омадааст дар изҳорот.

Заминларзаҳои 7,7 ва 7,6- дараҷаӣ 6 феврал бо фосилаи 9 соат дар музофоти Қаҳрамонмараши ҷанубу шарқи Туркия рух доданд. Ин зилзилаҳо ва баъдан садҳо пасларзаҳо дар 10 вилояти ин кишвар ва давлатҳои ҳамсоя эҳсос шуданд, ки аз ҳама бештар Сурия осеб дидааст.

Ёдовар мешавем, ки 11 феврал наҷотдиҳандагони Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон дар ҷараёни корҳои ҷустуҷӯӣ-наҷотдиҳӣ дар шаҳри Қаҳрамонмараши Туркия ду нафарро аз зери харобаҳо зинда берун оварданд.

Дар натиҷаи истифодаи оқилонаи дастгоҳҳои ошкор кардани одамон аз зери харобаҳо ду нафар пайдо карда шуда, пас аз бартараф кардани монеаҳо кӯдаки 6-моҳа ва падараш наҷот дода шуданд.

Онҳо 6 рӯз дар зери харобаҳои бино мондаанд ва пас аз наҷот дар бемористон бистарӣ шуданд.

Наҷотдиҳандагони Тоҷикистон то 12 феврал 25 ҷасадро аз зери харобаҳои биноҳои истиқоматӣ берун овардаанд.

Амалиёти ҷустуҷӯ ва наҷоти наҷотдиҳандагони Тоҷикистон дар Туркия идома дорад.

Мансур СУРУШ,
Ҷаҳонгир ГУЛМУРОДӢ,
АМИТ «Ховар»

АКС: Global Look Press Press / Shadati