ДУШАНБЕ, 30.03.2023 /АМИТ «Ховар»/. Девони вазирони Арабистони Саудӣ ёддоштро дар бораи ба шоҳигарӣ додани мақоми шарики Созмони ҳамкории Шанхай (СҲШ) тасдиқ кард. Тавре АМИТ «Ховар» хабар медиҳад, дар ин хусус ТАСС иттилоъ додааст.

Тибқи иттилои агентии хабарии Саудӣ, ҷаласаи девони вазирон  рӯзи сешанбе таҳти раисии Шоҳ Салмон бин Абдул Азиз Ал Сауд баргузор гардид. Аз ҷумла, ҳукумати Арабистони Саудӣ ёддоштро дар бораи ба шоҳигарӣ додани мақоми шарикӣ оид ба муколамаи СҲШ тасдиқ намуд.

Аъзои феълии СҲШ дар айни замон Ҳиндустон, Қазоқистон, Чин, Қирғизистон, Покистон, Русия, Тоҷикистон ва Узбекистон мебошанд. Афғонистон, Беларус, Эрон ва Муғулистон мақоми кишварҳои нозир ва Озарбойҷон, Арманистон, Камбоҷа, Непал, Туркия ва Шри-Ланка мақоми шарикро доранд.

16 сентябри соли 2022 дар саммити Самарқанд ёддоштҳо дар бораи шарикӣ оид ба муколама бо Миср, Қатар ва Арабистони Саудӣ ба имзо расиданд ва инчунин қарор қабул карда шуд, ки тартиби додани мақоми шарикони муколама ба Баҳрайн, Кувайт, Малдив, Мянма ва Аморати Муттаҳидаи Араб оғоз карда шавад.

Азиза ИКРОМ,
АМИТ «Ховар»

АКС аз манбаъҳои боз