Бар асари сӯхтор дар анбори сӯзишворӣ дар Ҷакарта 17 нафар ба ҳалокат расид

ДУШАНБЕ, 06.03.2023 /АМИТ «Ховар»/. Теъдоди ҳалокшудагон дар таркиши рӯзи ҷумъа, ки дар анбори нигаҳдории сӯзишворӣ дар шимоли пойтахти Индонезия ба амал омад, ба 17 нафар расид. Тавре ки АМИТ «Ховар» бо истинод ба «Синхуа» хабар медиҳад, дар ин хусус 4 март директори Агентии Ҷакарта оид ба рафъи офатҳои табиӣ Муҳаммад Ридван иттилоъ додааст.

Ба гуфтаи ӯ, шумораи ҳалокшудагони ин ҳодиса ба 51 нафар расидааст, ки ҳоло дар чанд беморхонаи Ҷакарта табобат мегиранд.

Таркиш дар анбори нигаҳдории сӯзишворӣ, ки ба ширкати давлатии Pertamina тааллуқ дорад, рӯзи ҷумъа, тақрибан соати 20:00 ба вақти маҳаллӣ рух дод. Пас аз таркиш оташ ба маҳали аҳолинишини ҳамсоя паҳн шуд, ки сокинони маҳаллӣ ба ҳарос афтода, хонаҳои худро тарк карданд.

Дар натиҷаи таркиш беш аз 1 ҳазор сокини маҳаллӣ зарар дид, ки ҳоло дар паноҳгоҳҳои муваққатӣ дар наздикии он қарор доранд. Ҳашт нафар бедарак шудаанд.

Дар ҷои таркиш корҳои ҷустуҷӯӣ-наҷотдиҳӣ идома доранд. Сабабҳо тафтиш карда мешаванд.

Азиза ДАДАБОЕВА,
АМИТ «Ховар»

АКС аз манбаъҳои боз