Бар асари сӯхтори ҷангал дар Австралия садҳо ҳайвон ба ҳалокат расид

ДУШАНБЕ, 10.03.2023 /АМИТ «Ховар»/. Дар ҷанубу шарқи Австралия майдони сӯхтори ҷангал паҳн мегардад. Бар асари ин сӯхтор дар минтақаи Ҳилл Энди иёлати Уэлси Нави Ҷанубӣ садҳо ҳайвон ба ҳалокат расид. Тавре АМИТ «Ховар» иттилоъ додааст, дар ин хусус АБИ «Казинформ» бо истинод ба ABC News хабар медиҳад.

Дар натиҷаи сӯхтор дар шимоли шаҳри Батерст ду хона ва панҷ бинои ёрирасон сӯхта, 400 сар гӯсфанд ва 300 сар чорвои калони шохдор ба ҳалокат расид. Майдони сӯхтор 15 700 гектарро ташкил дод.

Хадамоти сӯхторнишонии деҳот огоҳ кардааст, ки рӯзҳои наздик тақрибан чандсад хона, бахусус дар минтақаҳои Пирамул ва Харгрейвс метавонанд зери хатар монанд.

Намояндаи хадамоти сӯхторнишонӣ Анжела Берфорд изҳор намуд, ки новобаста аз беҳбуди вазъият, ҳолат ба мисли пештара хатарнок боқӣ мемонад, зеро «сӯхтор то ҳол бартараф карда нашудааст».

Иттилоъ дода мешавад, ки алангаи оташ ба самти шарқ ба сӯи нуругоҳи бодии Crudine Ridge Wind Farm паҳн мешавад.

6 март Бюрои обуҳавошиносии Австралия (BOM) огоҳ намуд, ки ҳавои гарм ва хушк метавонад боиси хатари ҷиддии сӯхтор дар қисмати шарқӣ ва шимолии Уэлси Нави Ҷанубӣ гардад.

Азиза ДАДАБОЕВА,
АМИТ «Ховар»

АКС аз манбаъҳои боз