Дар Форуми сармоягузории Ҷумҳурии Тоҷикистон ва Британияи Кабир маҳсулоти ватанӣ муаррифӣ мегардад

ДУШАНБЕ, 29.03.2023. /АМИТ «Ховар»/. Рӯзи дуюм аст, ки дар шаҳри Лондон Форуми сармоягузории Ҷумҳурии Тоҷикистон ва Подшоҳии Муттаҳидаи Британияи Кабир ва Ирландияи Шимолӣ идома дорад, ки дар он якчанд  ширкати ватанӣ ва вазорату идораҳо маҳсулоти худро муаррифӣ намуда истодаанд. Дар ин хусус ба АМИТ «Ховар» дар Палатаи савдо ва саноати ҷумҳурӣ хабар доданд.

Дар форуми мазкур аз ҷониби Тоҷикистон намояндагони бахши хусусӣ ва роҳбарони якчанд вазорату идораҳои мамлакат ва аз он ҷониб намояндагони зиёда аз 80 ширкати бонуфузи Британияи Кабир иштирок доранд.

Ҳамзамон дар доираи баргузории форум Намоишгоҳи молу маҳсулоти Ҷумҳурии Тоҷикистон дар соҳаҳои саноат, бахши истихроҷи маъданҳои кӯҳӣ, кишоварзӣ, сайёҳӣ ва хизматрасонии бонкӣ муаррифӣ гардида истодааст, ки дар он якчанд ширкати ватанӣ, содироткунандагон, вазорату идораҳо маҳсулот ва хизматрасонии худро муаррифӣ намуда истодаанд.

Мақсад аз баргузории форуми мазкур – ин густариши ҳамкории тиҷоратӣ, ҷалби сармоя ба соҳаҳои мухталиф ва муаррифии имконияти саноатию содиротии мамлакат мебошад.

АКС: Маркази матбуоти Палатаи савдо ва саноат