Дар Малави теъдоди ҳалокшудагон бар асари тӯфони «Фредди» аз 270 нафар гузашт

ДУШАНБЕ, 16.03.2023 /АМИТ «Ховар/.  Ҳукумати Малави ҳалокати 270 нафарро бар асари тӯфони тропикии Фредди, ки тайи муддати охир бори дуввум дар ҷануби Африқо ба амал меояд, тасдиқ кард. Тавре ки АМИТ «Ховар» иттилоъ медиҳад,  дар ин хусус агентии Reuters рӯзи чоршанбе, 15 март хабар додааст.

Иттилоъ дода мешавад, ки 707 нафар аз оқибатҳои офати табиӣ зарар дида, 41 нафар бедарак шудааст. Дар якчанд минтақаи давлати Африқо боронҳои пуршиддат идома доранд. Ба иттилои агентӣ, ҳисоби шумораи ҳалокшудагон идома дошта, теъдоди онҳо метавонад аз 300 нафар гузарад.

Дар баробари ин, мувофиқи маълумоти Раёсати мубориза бо офатҳои табиӣ, то 15 март тӯфони «Фредди» пароканда шуда, дар байни музофоти Замбезия (Мозамбики марказию шимолӣ) ва гулӯгоҳи Мозамбик ҷойгир мешавад.

Қаблан, 13 март, дар бораи ҳалокати 15 нафар дар Малави ва Мозамбик бар асари ҳодисаи табиӣ иттилоъ расида буд.

Азиза ДАДАБОЕВА,
АМИТ «Ховар»

АКС аз манбаъҳои боз