ДУШАНБЕ, 20.03.2023. /АМИТ «Ховар»/. Ғолибони даври ҷумҳуриявии озмуни «Кадбонуи беҳтарин» муайян гардиданд. Дар он ҷойи якум ба кадбонуҳои шаҳри Душанбе, ҷойи дуюм ба кадбонуҳои Вилояти Мухтори Кӯҳистони Бадахшон, вилоятҳои Суғду Хатлон ва ҷойи сеюм ба кадбонуҳои шаҳри Турсунзода ва ноҳияи Рашт сазовор дониста шуд. Дар ин хусус ба АМИТ «Ховар» дар Кумитаи кор бо занон ва оилаи назди Ҳукумати Ҷумҳурии Тоҷикистон хабар доданд.

Даври ҷамъбасти Озмуни ҷумҳуриявии «Кадбонуи беҳтарин» бо иштироки муовини Сарвазири Ҷумҳурии Тоҷикистон Матлубахон Сатториён, сардори Раёсати рушди иҷтимоии Дастгоҳи иҷроияи Президенти Ҷумҳурии Тоҷикистон Гулҷаҳон Абдуфаттоҳзода, роҳбарияи  Кумитаи кор бо занон ва оилаи назди Ҳукумати Ҷумҳурии Тоҷикистон, муовини Раиси Ҳизби Халқии Демократии Тоҷикистон, роҳбарияти Мақомоти иҷрояи ҳокимияти давлатии шаҳри Душанбе, роҳбарон ва намояндагони вазорату идораҳо, ташкилоту муассисаҳо дар муассисаи давлатии «Боғи Ирам» доир гардид.

Дар он кадбонуҳои чирадасти Вилояти Мухтори Кӯҳистони Бадахшон, вилоятҳои Суғду Хатлон, шаҳру ноҳияҳои тобеи ҷумҳурӣ, шаҳри Душанбе ва ноҳияҳои водии Рашт маҳорату малакаи баланди кадбонуии худро ба маърази тамошо гузоштанд.

Ғолибони озмун дар фазои тантанавӣ аз ҷониби меҳмонони воломақом бо Диплом ва мукофоти пулӣ сарфароз гардиданд.

Кадбонуҳои шаҳру ноҳияҳои дигари ҷумҳурӣ барои иштироки фаъолона дар Озмуни ҷумҳуриявии «Кадбонуи беҳтарин» бо Сипосномаи Кумитаи кор бо занон ва оилаи назди Ҳукумати Ҷумҳурии Тоҷикистон қадрдонӣ карда шуданд.

Барномаи рангини фарҳангии аҳли санъату ҳунар ба ҳамоиш фазою шаҳомати идона зам намуд.

АКС: Кумитаи кор бо занон ва оилаи назди Ҳукумати Ҷумҳурии Тоҷикистон