Сарвари давлат Эмомалӣ Раҳмон дар шаҳри Душанбе Муассисаи таҳсилоти умумии ғайридавлатии «Мактаби ҷаҳон»-ро ба истифода доданд

Март 13, 2023 11:11

ДУШАНБЕ, 13.03.2023 /АМИТ «Ховар»/. 13 март Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ дар ноҳияи Фирдавсии пойтахт Муассисаи таҳсилоти умумии ғайридавлатии «Мактаби ҷаҳон» (Global school)-ро дар вазъияти тантанавӣ ба истифода доданд.

Муассисаи нави таълимӣ бо ҷонибдорӣ аз сиёсати маорифпарваронаи Сарвари давлат муҳтарам Эмомалӣ Раҳмон бо мақсади амалӣ намудани иқдомот дар самти рушди соҳаи маориф, хосса баланд бардоштани сатҳи донишомӯзии насли наврас аз ҷониби роҳбарияти Ҷамъияти дорои масъулияти маҳдуди «Глобал Лизинг» таъсис дода шудааст.

Мактаби замонавӣ дар доираи омодагиҳо ба ҷашни 35-солагии Истиқлоли давлатии Ҷумҳурии Тоҷикистон бунёд гардида, аз 5 ошёна иборат мебошад ва дар масоҳати беш аз 27 садяк замин ҷойгир шудааст.

Бинои таълимӣ дар асоси меъёрҳои байналмилалӣ бо тамоми шароити муосир таъмин карда шуда, дорои 28 синфхонаи муҷаҳҳази таълимии фаннӣ, аз ҷумла физика, химия, биология, технологияи информатсионӣ, 6 хуҷраи корӣ, толори фарҳангӣ бо 80 ҷойи нишаст, ошхона барои 110 нафар дар як баст, китобхона бо адабиёти гуногуну толори хониш, толори варзиш ва майдончаи варзишии тобистона мебошад.

Ҳамчунин дар назди мактаби нав Муассисаи томактабӣ бо тамоми шароити зарурӣ барои 60 нафар таъсис дода шудааст.

Кӯдакистон дар ошёнаи якуми иншоот ҷойгир буда, дорои шаш синфхонаи барҳавои машғулиятгузаронӣ ва ҳуҷраҳои хобу истироҳат барои дӯстрӯякон мебошад. Дар синфхонаҳои машғулиятгузаронӣ бо мақсади ташаккулу инкишофи кӯдакон ва тарбияи онҳо дар руҳияи ватандӯстиву хештаншиносӣ имконоти мусоид мавҷуд аст.

Муассисаи таҳсилоти умумии ғайридавлатии «Мактаби ҷаҳон» дар якҷоягӣ бо кӯдакистон барои 560 нафар пешбинӣ гардида, бо системаи гармидиҳӣ пайваст мебошад.

Бо таъсис ва ба фаъолият оғоз кардани муассисаи нави таълимӣ дар пойтахти мамлакат беш аз 70 нафар, аз ҷумла 23 мутахассис ба ҳайси омӯзгор ва мураббӣ бо ҷойи кор ва маоши хуб таъмин гардиданд.

Раванди таълим дар ин боргоҳи маърифат бо забонҳои хориҷӣ, аз ҷумла русию англисӣ дар асоси барномаҳои давлатии таълимии соҳавӣ ва ба тариқи шартномавӣ ба роҳ монда шудааст. Хонандагон ба муассисаи таълимӣ бо роҳи суҳбат қабул карда мешаванд.

Дар муассисаи навтаъсиси таълимӣ ба омӯзиши фанҳои дақиқ таваҷҷуҳи зиёд равона гардида, синфхонаҳои фаннӣ дар доираи татбиқи ҳадафҳои «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф», солҳои 2020-2040 бо тамоми лавозимоту аёнияти таълимӣ муҷаҳҳаз карда шудаанд.

Дар мактаби навтаъсис дар ноҳияи Фирдавсии шаҳри Душанбе ҳамзамон кӯдакони муассисаи томактабию ибтидоӣ ба маҳфилҳои гуногун, аз ҷумла намудҳои гуногуни варзиш, хореография ва рақси мавзун ҷалб мегарданд.

Пешвои миллат муҳтарам Эмомалӣ Раҳмон зимни шиносоӣ бо муассисаи нави таълимӣ иқдоми роҳбарияти Ҷамъияти дорои масъулияти маҳдуди «Глобал Лизинг»-ро боиси дастгирӣ арзёбӣ намуда, хонандагону омӯзгоронро ба истифодаи мақсаднок аз имконоти муҳайёгардида роҳнамоӣ карданд.

Таълими босифат, ташаккули шахсият, омӯзиши донишҳои муосир ба хонандагон ва тарбияи онҳо дар руҳияи ватандӯстиву хештаншиносӣ аз ҳадафҳои асосӣ дар самти таъсиси Муассисаи таҳсилоти умумии ғайридавлатии «Мактаби ҷаҳон» дар шаҳри Душанбе арзёбӣ мешавад.

Ифтитоҳи Муассисаи таҳсилоти умумии ғайридавлатии «Мактаби ҷаҳон» (Глобал скул) дар шаҳри Душанбе 13.03.2023

Март 13, 2023 11:11

Хабарҳои дигари ин бахш

ҶУДО. Панҷ узви мунтахаби Тоҷикистон дар Гранд Слами Анталия иштирок менамоянд
ВАТАНРО МИСЛИ СПИТАМЕН, ТЕМУРМАЛИКУ ВОСЕЪ БОЯД ДӮСТ ДОШТ. Ҷавонон бояд бо сари баланд ба хизмати ҳарбӣ раванд!
Ҳайати Тоҷикистон дар шаҳри Санкт-Петербурги Русия дар форуми «Ҷомеаи солим» иштирок намуд
Дар Осиёи Марказӣ ҳамдигарро бо ибораи тоҷикии «Наврӯз муборак!» таҳният мегўянд, — бардошт аз ҷашни наврўзӣ дар Бӯстон
Суханронии Президенти Ҷумҳурии Тоҷикистон Эмомалӣ Раҳмон дар маросими пӯшидашавии Конфронси оби СММ-2023
Президенти Ҷумҳурии Тоҷикистон Эмомалӣ Раҳмон дар маросими пӯшидашавии Конфронси оби СММ иштирок намуданд
Пешвои миллат Эмомалӣ Раҳмон бо мудири иҷроияи Хазинаи кудакони Созмони Милали Муттаҳид (ЮНИСЕФ) Катерин Рассел мулоқот намуданд
РАВАНДИ ОБИ ДУШАНБЕ. Тоҷикистон дар меҳвари ташаббусҳои бузурги байналмилалӣ дар соҳаи об
Дар Ҷамоати деҳоти Эсанбойи ноҳияи Рӯдакӣ қариб 700 гектар замин обёрӣ гардид
Президенти Ҷумҳурии Туркия Реҷеп Тайип Эрдоган ба Президенти Ҷумҳурии Тоҷикистон Эмомалӣ Раҳмон барқияи табрикӣ ирсол намуд
Дар Донишгоҳи миллии Тоҷикистон толору озмоишгоҳи технологияҳои компютерӣ ба истифода дода шуд
РАВАНДИ ОБИ ДУШАНБЕ. Нақши Тоҷикистон дар баргузории Конфронси оби СММ-2023 — таассуроти роҳбарони ҳайатҳои давлатҳои хориҷӣ