ҲАМКОРИИ МИЛИТСИЯ БО АҲОЛӢ. Дар Бадахшон ба ҷиноят даст задани ноболиғон 80% кам шудааст

ДУШАНБЕ, 05.04.2023 /АМИТ «Ховар»/. Баргузории чорабиниҳои маърифатӣ-ҳуқуқӣ ва санҷишу амалиёти пешгирӣ-фаҳмондадиҳӣ байни наврасону ноболиғон ба кам гардидани шумораи ҷинояткории ноболиғон мусоидат карда, дар ин давра шумораи содиршавии ҷиноят аз ҳисоби ноболиғон 80% кам гардидааст. Дар ин хусус зимни баргузории ҷаласаи фаврӣ-хизматӣ оид ба ҷамъбасти натиҷаҳои фаъолияти мақомоти корҳои дохилии Раёсати Вазорати корҳои дохилӣ дар Вилояти Мухтори Кӯҳистони Бадахшон иттилоъ дода шуд.

Тавре ба АМИТ «Ховар» дар Раёсати мазкур хабар доданд, дар маҷлисгоҳи Раёсати Вазорати корҳои дохилӣ дар Вилояти Мухтори Кӯҳистони Бадахшон ҷаласаи фаврӣ-хизматӣ оид ба ҷамъбасти натиҷаҳои фаъолияти мақомоти корҳои дохилии ВМКБ дар давраи 3 моҳи сипаришудаи соли равон баргузор шуд.

Гуфта шуд, ки бо назардошти таъмин будани суботи комили сиёсӣ ва фазои орому ҳамдигарфаҳмӣ, ҳамчунин босуръат идома ёфтани марҳилаи нави рушду тараққиёт дар Бадахшон фаъолияти мақомоти милитсия ба иҷрои таъмини босифати дастуру супоришҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон доир ба решакан намудани ҷинояткорӣ дар Бадахшон, ҳамчунин баланд бардоштани маърифати ҳуқуқии ҷомеа, таъмини солимии оила ва хонаводаҳо, баррасии муроҷиат ва арзу шикоятҳои шаҳрвандон ва ҳифзи ҳуқуқу манфиатҳои сокинон равона карда шудааст.

Иттилоъ дода шуд, ки аз шумораи умумии ҷинояҳое, ки давоми 3 моҳи имсол дар миқёси вилоят содир ва ба қайд гирифта шудааст, ошкорнамоиаш пурра таъмин гардид. Фоизи кушодашавии ҷиноятҳо нисбат ба ҳамин давраи соли пеш 5,6% беҳтар гардидааст. Яъне, ҳуқуқу манфиатҳои поймолшудаи сокинони шаҳру ноҳияҳои вилоят барқарор гардида, барои таъмини адолати иҷтимоӣ ҳар  содиркунандаи кирдори зиддиҳуқуқӣ ба ҷавобгарӣ ҷалб гардид.

Дар ҷаласа тазаккур дода шуд, ки дар давраи ҳисоботӣ аз ҷониби мақомоти милитсияи вилоят 26 ҳолати ҷинояти вазнин ва махсусан вазнин дар намуди ташкили иттиҳоди ҷиноятӣ ошкору муайян ва ҳамаи содиркунандагони он, ки сокинони дигар минтақаҳои мамлакат мебошанд, дар ҳудуди вилоятҳои Суғду Хатлон, шаҳри Душанбе ва ноҳияҳои тобеи марказ дастгир ва барои тафтиши шаффоф ба шаҳри Хоруғ интиқол дода шуданд. Дар натиҷа нақшаву ниятҳои ғаразноки онҳо, ки пайомади барои ҷомеа хавфнок дошт, пешгирӣ карда шуд.

АКС: Раёсати Вазорати корҳои дохилӣ дар Вилояти Мухтори Кӯҳистони Бадахшон