Дар Бадахшон корҳои хуррамгардонӣ вусъати тоза меёбанд

ДУШАНБЕ, 05.04.2023 /АМИТ «Ховар»/. Дар Вилояти Мухтори Кӯҳистони Бадахшон имсол дар баробари дарахти бед инчунин шинондани ниҳолҳои хучу ангат низ ба нақша гирифта шудааст. Ин нукта дар ҷаласаи ғайринавбатии назди роҳбарияти вилоят бо иштироки сохторҳои аграрӣ зимни масъалаи вусъат бахшидани корҳои сабзу хуррамгардонӣ дар шаҳру ноҳияҳо мавриди баррасӣ қарор дода шуд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии вилоят хабар медиҳад.

Таъкид шуд, ки бо мусоид омадани боду ҳаво аллакай корҳои сабзу хуррамгардонӣ дар шаҳру ноҳияҳои вилоят бо ҷалби сохторҳои масъул вусъати рӯзафзун пайдо намудааст.

Дар ин замина соли гузашта бо ибтикори Мақомоти иҷроияи ҳокимияти давлатии вилоят нахустин бор дар ноҳияи баландкӯҳи Мурғоб шинондани ниҳол ба роҳ монда шуд, ки имрӯз аксарияти ниҳолҳои шинонида нашъунамои хуб доранд.

Ҳамчунин дар ин замина ба таври таҷрибавӣ парвариши картошка дар заминҳои ноҳия ба роҳ монда мешавад.

Роҳбари вилоят ба сохторҳои масъул бобати тезонидани ҷараёни корҳои ободонию созандагӣ ва сабзу хуррамгардонӣ супоришҳои иловагӣ дод.

АКС: Мақомоти иҷроияи ҳокимияти давлатии Вилояти Мухтори Кӯҳистони Бадахшон