Дар Остона ҷаласаи 17-уми Комиссияи муштараки байниҳукуматии Тоҷикистон ва Қазоқистон баргузор гардид

ДУШАНБЕ, 25.04.2023 /АМИТ «Ховар»/. Масъалаҳои муҳими марбут ба тақвияти ҳамкорӣ дар самти тиҷорату иқтисод байни Тоҷикистону Қазоқистон дар ҷаласаи ҳабдаҳуми Комиссияи муштараки байниҳукуматии Тоҷикистон ва Қазоқистон оид ба ҳамкории иқтисодӣ, техникӣ ва илмӣ, ки 24 апрел дар шаҳри Остона доир гардид, баррасӣ карда шуд. Дар ин хусус АМИТ «Ховар» бо истинод ба Кумитаи давлатии сармоягузорӣ ва идораи амволи давлатии Ҷумҳурии Тоҷикистон иттилоъ медиҳад.

Ҷаласаи ҳабдаҳуми Комиссияи муштараки байниҳукуматии Тоҷикистон ва Қазоқистон оид ба ҳамкории иқтисодӣ, техникӣ ва илмӣ  таҳти ҳамраисии муовини Сарвазири Ҷумҳурии Тоҷикистон  Усмоналӣ Усмонзода ва муовини Сарвазири Ҷумҳурии Қазоқистон Роман Скляр баргузор гардид.

Дар ҷаласа ҷонибҳо ҷиҳати тақвияти ҳамкорӣ дар самтҳои тиҷоративу иқтисодӣ, сармоягузорӣ, кишоварзӣ, саноат, энергетика, нақлиёт, алоқа ва технологияҳои муосир, маориф ва илм, тандурустӣ, сайёҳӣ, меҳнат ва муҳоҷират, иқтисоди сабз ва рақамӣ, ҳифзи муҳити зист, варзиш ва таъсиси корхонаҳои муштараки саноатӣ бо ҷалби сармоягузорони Қазоқистон ба мувофиқа расиданд.

Ҷаласа дар фазои дӯстӣ ва якдигарфаҳмӣ баргузор шуда, дар анҷоми он Протоколи чаласаи ҳабдаҳуми Комиссияи муштараки байниҳукуматии Тоҷикистон ва Қазоқистон оид ба ҳамкории иқтисодӣ, техникӣ ва илмӣ ба имзо расонида шуд.

   АКС: Кумитаи давлатии сармоягузорӣ ва идораи амволи давлатии Ҷумҳурии Тоҷикистон