Туҳфаҳои Пешвои миллат ба Мактаб-интернат барои кӯдакони ятим ва бепарастори шаҳри Бӯстон расонида шуд

ДУШАНБЕ, 20.04.2023. /АМИТ «Ховар»/. Туҳфаҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон  муҳтарам Эмомалӣ Раҳмон ба тарбиятгирандагони Муассисаи давлатии Мактаб-интернат барои кӯдакони  ятим ва бепарастори Мақомоти иҷроияи ҳокимияти давлатии вилояти Суғд, воқеъ дар шаҳри Бӯстон тақдим карда шуд. Туҳфаҳои идонаро ба тарбиятгирандагони ин муассисаи иҷтимоӣ муовини Сарвазири мамлакат Матлубахон Сатториён тақдим намуд.

Туҳфаҳои Президенти Ҷумҳурии Тоҷикистон муҳтарам Эмомалӣ Раҳмон иборат аз либоси мактабӣ, либоси варзишӣ ва пойафзол ба 79 тарбиятгирандаи Мактаб-интернат дар шаҳри Бӯстон супорида шуд. Ҳамчунин дар ин рӯз барои тарбиятгирандагони муассисаи мазкур дастурхони идона низ ороста шуд.

Аснои суҳбат бо тарбиятгирандагон таъкид карда шуд, ки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар сиёсати иҷтимоии худ таваҷҷуҳ ба ятимону бепарасторон, беморон ва оилаҳои ниёзмандро дар мадди аввал қарор додаанд. Имрӯз нафарони бо амри такдир аз падару модар маҳруммонда ҳеҷ гоҳ худро танҳо ҳис намекунанд.

Дар мактаб-интернати мазкур 79 кӯдаки бо амри тақдир аз падару модар маҳруммонда ба таълиму тарбия ва ғамхориву парасторӣ фаро гирифта шудааст.

Дар ин ҷо ҳамаи шароит барои босаводу бомаърифат ба камол расидани наврасон фароҳам буда, омӯзгорон бо онҳо чун бо фарзанди худ муносибат менамоянд.