72 хатмкунандаи Донишгоҳи давлатии Кӯлоб ба хизмати ҳарбӣ гусел карда шуд

КӮЛОБ, 07.05.2023 /АМИТ «Ховар»/. 5 май дар Донишгоҳи давлатии Кӯлоб ба номи Абуабдуллоҳи Рӯдакӣ  маросими гусели 72 хатмкунандаи донишгоҳ, ки бо амри дил ҷиҳати адои хизмати ҳарбӣ дар сафи Қувваҳои Мусаллаҳи Ҷумҳурии Тоҷикистон ариза навишта, азми ҳимояи Ватан намудаанд, баргузор гардид. Дар ин хусус ба мухбири минтақавии АМИТ «Ховар» Сулаймон Холзода дар Донишгоҳи давлатии Кӯлоб хабар доданд.                             . 

Ҷавонони далеру шуҷои донишгоҳ бо ҳисси баланди ватандӯстиву хештаншиносӣ, ифтихор аз давлату миллати хеш барои ҳифзу ҳимояи Ватан-Модар омодагии худро баён дошта, баҳри адо намудани қарзи муқаддаси шаҳрвандӣ ба хизмати ҳарбӣ равон гаштанд.

Дар ҷамъомад иброз гардид, ки Қувваҳои Мусаллаҳи ҷумҳурӣ зодаи даврони соҳибистиқлолии мамлакат буда, ба таъсиси он сӣ сол пур шудааст. Артиши миллӣ давоми се даҳсола бо дастгирӣ ва пуштибониҳои Президенти Ҷумҳурии Тоҷикистон муҳтарам Эмомалӣ Раҳмон ба неруи тавоно ва пуриқтидор табдил ёфта, аз имтиҳони сангин гузашт. Имрӯзҳо Қувваҳои Мусаллаҳ ҳамаҷиҳата рушду такомул ёфта, бо навтарин яроқу аслиҳаи ҷангӣ таъмин мебошад ва дар он барои хизматчиёни ҳарбӣ муосиртарин шароити буду бош фароҳам оварда шудааст. Сафи Артиши миллиро ҷавонони ҷасуру далери Ватан пурра намуда, омодагии худро баҳри дифои ин сарзамини аҷдодӣ баён медоранд.

Гуфта шуд, ки ҳамасола хатмкунандагони донишгоҳу донишкадаҳои Тоҷикистон ба сафи Артиши миллии мамлакат ҷалб гардида, рисолати ҷавонмардии хешро содиқона иҷро менамоянд.

Баъдан аз ҷониби модарони даъватшудагон маросими мардумии «Нонгазон» баргузор гардид.  

АКС: Донишгоҳи давлатии Кӯлоб ба номи Абуабдуллоҳи Рӯдакӣ