5 июн дар шаҳри Гулистон ҷаласаи Мушовараи якҷояи вазоратҳои корҳои дохилии Тоҷикистон ва Русия баргузор гардид

Июнь 6, 2023 08:55

ДУШАНБЕ, 06.06.2023 /АМИТ «Ховар»/. 5 июн дар шаҳри Гулистони вилояти Суғд ҷаласаи Мушовараи якҷояи Вазорати корҳои дохилии Ҷумҳурии Тоҷикистон ва Вазорати корҳои дохилии Федератсияи Русия баргузор гардид, ки дар он масъалаҳо оид ба муборизаи дастҷамъона бар зидди хатарҳои замони муосир: терроризм, экстремизм, муомилоти ғайриқонунии маводи мухаддир, инчунин тақвият бахшидани ҳамкории минбаъдаи мақомоти корҳои дохилии ҳар ду мамлакат барои боздошти ҷинояткорони ҷустуҷӯшаванда, истифода аз малакаи касбии сохторҳои ташхиси криминалистӣ, тафтишоту таҳқиқ, хадамоту дастгоҳҳои фаврӣ ва алоқа баррасӣ гардиданд, хабар медиҳад АМИТ «Ховар» бо истинод ба Вазорати корҳои дохилии Ҷумҳурии Тоҷикистон.

Пешгирӣ аз ҷиноятҳое, ки бо истифода аз технологияҳои замони муосир содир мешаванд, аз ҷумла азонихудкунии маблағҳо, бо роҳи тасарруфи маблағҳои электронии пулӣ, маблағгузорӣ ба шабакаҳои экстремистиву террористӣ аз мавзуъҳое буданд, ки ҳайати ду ҷониб барои ҳалли онҳо таваҷҷуҳ намуданд. Тайёр намудани кадрҳои баландихтисоси самтҳои фаъолияти мақомоти корҳои дохилӣ бо истифода аз имкониятҳои муассисаҳои олии таълимии ВКД Федератсияи Русия низ дар рафти мушовара баррасӣ гардид.

Намояндагони масъули вазоратҳои корҳои дохилии ҳар ду ҷониб баргузории мушовараҳои муштаракро омили таҳкимбахши ҳамкорӣ ва робитаи доимии вазоратҳои корҳои дохилии ду давлат арзёбӣ намуданд.

Ҷонибҳо зимни баррасии масъалаҳои рӯзномаи ҷаласаи якҷоя ба тавофуқ расиданд, ки муборизаи дастаҷамъонаи мақомоти ду мамлакат барои решакан намудани ҷинояту ҷинояткорӣ, аз қабили терроризму экстремизм, гардиши ғайриқонунии маводи мухаддир ва силоҳ, киберҷиноятҳо ва дигар шаклҳои фаромилии кирдорҳои зидиҳуқуқӣ нақши арзанда хоҳад гузошт.

Ҳамзамон масъалаҳои муҳоҷират ва мушкилоти алоқаманд ба он мавриди муҳокимаронии роҳбарони аввали Вазоратҳои корҳои дохилии Тоҷикистону Русия қарор гирифт.

Бояд тазаккур дод, ки пеш аз оғози Мушовараи якҷояи Вазоратҳои корҳои дохилии Ҷумҳурии Тоҷикистон ва Федератсияи Русия ҳайати меҳмонон манзараҳои зебои табиати макони истироҳатии Маркази таълимии Раёсати минтақавии Бонки миллии Ҷумҳурии Тоҷикистон дар вилояти Суғдро тамошо карданд.

Акрам Сангзода,
АМИТ «Ховар»

АКС: Вазорати корҳои дохилии Ҷумҳурии Тоҷикистон

Июнь 6, 2023 08:55

Хабарҳои дигари ин бахш

ЭЪЛОН: «ВАССОФИ ВАТАН». Барои рӯзноманигорон ва корбарони саҳифаҳои иҷтимоии шабакаҳои интернетӣ фестивал-озмун баргузор мешавад
Ҳангоми истифодаи хабару маводи сомона истинод ба www.khovar.tj ҳатмӣ аст!
Саҳифаҳои расмии АМИТ «Ховар» дар шабакаҳои иҷтимоӣ: facebook.com/niatkhovar, t.me/niatkhovar, youtube.com/@niat_Khovar_tj, instagram.com/niat_khovar/, twitter.com/niatkhovar, Радиои Ховар 101.5 fm, facebook.com/khovarfm/
Ҷавонон бояд қарзи шаҳрвандӣ — таҳсили илму дониш ва саҳмгузорӣ дар пешрафти Ватанро софдилона иҷро намоянд
Масъалаи зиёд намудани сармоягузорӣ ба татбиқи Неругоҳи барқи обии «Роғун» баррасӣ гардид
Тоҷикистон дар мубориза бо қочоқ ва муомилоти ғайриқонунии маводи нашъаовар нақши калидӣ дорад
Ҳайати Тоҷикистон дар чорабиниҳои канорӣ дар доираи иҷлосияи 67-уми Комиссияи Созмони Милали Муттаҳид оид ба воситаҳои нашъадор иштирок намуд
Президенти Ҷумҳурии Тоҷикистон Эмомалӣ Раҳмон бо Президенти Федератсияи Русия Владимир Путин суҳбати телефонӣ анҷом доданд
Сарвари давлат Эмомалӣ Раҳмон ҷаласаи Шурои амният баргузор намуданд
Дар Вена ҳамкории Тоҷикистон бо Чин ва Эрон дар мубориза бо муомилоти ғайриқонунии маводи нашъадор баррасӣ шуд
Ҷаласаи гурӯҳҳои кории ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон баргузор гардид
Ҳайати Тоҷикистон дар чорабинии канории Қазоқистон дар Вена иштирок намуд