Дар Академияи идоракунии давлатӣ Маркази барномаи глобалии роҳбарӣ дар озмоишгоҳҳо ифтитоҳ гардид

Июнь 28, 2023 17:27

ДУШАНБЕ, 28.06.2023. /АМИТ «Ховар»/. 26 июн дар Академияи идоракунии давлатии назди Президенти Ҷумҳурии Тоҷикистон маросими кушодашавии  Маркази барномаи глобалии роҳбарӣ дар озмоишгоҳҳо баргузор гардид. Дар ин хусус АМИТ «Ховар» бо истинод ба Академияи идоракунии давлатӣ хабар медиҳад.

Дар маросими мазкур  роҳбариятҳои Академия,  Вазорати тандурустӣ ва ҳифзи иҷтимоии аҳолӣ, намояндаи расмии Созмони умумиҷаҳонии тандурустӣ, роҳбарияти ҳамкории Созмони умумиҷаҳонии тандурустӣ дар Тоҷикистон, дигар шахсони расмӣ ва  мутахассисону коршиносони соҳа иштирок намуданд.

Гуфта шуд, ки  ифтитоҳи Маркази мазкур идомаи ҳамкории байналмилалии Академия дар самти татбиқи ҳадафҳои стратегии роҳбарияти мамлакат ва дар ин замина беҳтар намудани шароити моддиву техникии муассисаи таълимӣ мебошад.

Иброз гардид, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паём ба Маҷлиси Олии Ҷумҳурии Тоҷикистон  «Дар бораи самтҳои асосии сиёсати дохилӣ ва хориҷии ҷумҳурӣ» таъкид намуданд, ки барои ҳалли ду масъалаи муҳимтарини соҳаи тандурустӣ – тайёр кардани кадрҳои баландихтисос, аз ҷумла мутахассисони бемориҳои сироятӣ ва вирусологҳо ва рушди саноати дорусозӣ бояд чораҳои ҷиддӣ андешида шаванд.

Дар ин робита Маркази барномаи глобалии роҳбарӣ дар озмоишгоҳҳо ба фаъолият шуруъ намуд, ки онро  Академияи идоракунии давлатӣ дар якҷоягӣ бо Созмони умумиҷаҳонии тандурустӣ ва Вазорати тандурустӣ ва ҳифзи иҷтимоии аҳолии Ҷумҳурии Тоҷикистон таъсис доданд. Ин Марказ барои Академия ва тамоми низоми хадамоти озмоишгоҳҳои  Ҷумҳурии Тоҷикистон як рӯйдоди муҳим ба ҳисоб меравад.

Маркази мазкур дар доираи Барномаи глобалии роҳбарони озмоишгоҳҳо бо мақсади таъмини сатҳи баланди роҳбарии хадамоти миллии озмоишгоҳҳои  ҷумҳурии мо ва баланд бардоштани сифати хизматрасониҳо дар онҳо таъсис дода шудааст.

Марказ барномаҳои таълимиро оид ба такмили ихтисос ва бозомӯзии роҳбарон ва мутахассисони озмоишгоҳҳои  сатҳҳои гуногун, инчунин рушди малакаҳои онҳо дар соҳаи идоракунии дурусти озмоишгоҳҳо ва гузаронидани корҳои илмӣ-тадқиқотӣ амалӣ менамояд.

Дар идома тазаккур дода шуд, ки Маркази мазкур дар беҳтар намудани сифат ва самаранокии кори озмоишгоҳҳои  таҳқиқотиву вирусшиносӣ кӯмак хоҳад намуд. Дар заминаи Марказ минбаъд курсҳои такмили ихтисос ва таҷрибаомӯзӣ барои роҳбарони озмоишгоҳҳои ҳудуди мамлакат  баргузор карда шуда, тренерон аз ҳисоби мутахассисони соҳибтаҷриба ҷалб шуда, ба онҳо дарс мегӯянд.

Тавре таъкид карда шуд, ҳадаф аз таъсиси Маркази глобалии барномаи роҳбарӣ дар озмоишгоҳҳо дар амал татбиқнамоии таҷрибаи ҷаҳонӣ дар самти идоракунии озмоишгоҳҳо, беҳтар намудани сифат ва самаранокии фаъолияти онҳо  барои аҳолӣ ва ба стандартҳои байналмилалӣ ҷавобгӯ гардонидани озмоишгоҳҳои Тоҷикистон мебошад.

АКС: Академияи идоракунии давлатии назди Президенти Ҷумҳурии Тоҷикистон

Июнь 28, 2023 17:27

Хабарҳои дигари ин бахш

Дар Донишгоҳи технологии Тоҷикистон оид ба Эъломияи Хуҷанд ҳамоиши ҷумҳуриявӣ доир шуд
Таътили тобистонаи хонандагон кай оғоз меёбад?
Анушервон Зоиров ғолиби озмуни шаҳрии «Хонандаи сол-2024» гардид
Даври шаҳрии озмуни «Хонандаи сол-2024» баргузор гардид
Дар Хуҷанд ғолибони олимпиадаи минтақавӣ қадрдонӣ карда шуданд
Дар Донишгоҳи миллии Тоҷикистон бахшида ба имзои Эъломияи Хуҷанд ҳамоиши илмӣ баргузор гардид
Сиёсати сулҳҷӯёнаи Пешвои миллат – заминаи стратегии густариши муносибатҳои Тоҷикистон, Узбекистон ва Қирғизистон
Дар Хуҷанд Олимпиадаи минтақавии хонандагон барои дарёфти «Ҷоми Раёсати ДБССТ» оғоз гардид
35-СОЛАГИИ ИСТИҚЛОЛИ ДАВЛАТӢ. Дар Хатлон дар назди муассисаи таълимӣ бинои иловагӣ ба истифода дода шуд
Донишҷӯёни Донишгоҳи техникии Тоҷикистон дар озмуни маҳорату маллакаи касбӣ дар Чин соҳиби медали нуқра шуданд
Дар деҳаи Лолазори ноҳияи Деваштич муассисаи томактабӣ сохта мешавад
Дар Донишгоҳи давлатии Кӯлоб Озмуни ҷумҳуриявии «Фурӯғи субҳи доноӣ китоб аст» баргузор гардид