Дар Хоруғ Иттиҳодияи истеҳсолии матбааи вилоятӣ дубора ба фаъолият шуруъ менамояд

ХОРУҒ, 10.06.2023. /АМИТ «Ховар»/. Иттиҳодияи истеҳсолии матбааи Вилояти Мухтори Кӯҳистони Бадахшон чанд сол пеш бо сабаби аз кор мондани дастгоҳҳои чопӣ фаъолияташро муваққатан қатъ намуд. Роҳбарияти рӯзномаҳои вилоятию ноҳиявӣ маҷбур буданд, ки нашрияҳоро дар  чопхонаҳои шаҳри Душанбе ба нашр расонанд. Айни замон ин иттиҳодияи истеҳсолӣ навсозӣ  ва бо таҷҳизоти муосири чопӣ таъмин гардид, ки фаъолияти дубораи он  мушкили дар пойтахт чоп намудани рўзномаҳоро аз байн мебарад.  Дар ин хусус мухбири минтақавии  АМИТ «Ховар» хабар медиҳад.

Мутахассисони Иттиҳодияи истеҳсолии матбааи вилоят ба таври таҷрибавӣ чанд нусха рӯзномаи шаҳрии «Оинаи зиндагӣ»-ро ба табъ расонданд, ки кормандони эҷодии ин нашрия  аз сифати чоп изҳори қаноатмандӣ намуданд.

Сардори иттиҳодияи мазкур Шодӣ Алифшоев гуфт, ки тирамоҳи соли гузашта бо кумаки раиси вилоят матбааи вилоятӣ соҳиби дастгоҳи муосири чопии «Роланд 2000» гардид ва ҳамзамон мақомоти иҷроияи ҳокимияти давлатии вилоят барои таъмиру навсозии бинои чопхона зиёда аз 300 ҳазор сомонӣ ҷудо кард. Алъон корҳои асосии сохтмонӣ ба анҷом расида, тасмим гирифта шудааст, ки  дар арафаи Рўзи  ваҳдати миллӣ мавриди истифода қарор  гирад.

Акнун дар матбаа  на танҳо рӯзномаҳои вилоятию ноҳиявӣ бо сифати баланд ба табъ мерасанд, балки  чопи варақаҳои иттилоотию бозоргонӣ ва тарғиботию ташвиқотӣ, ҳамчунин китобу маҷаллаҳо  низ  ба роҳ монда мешавад.

Сармуҳаррири рўзномаи вилоятии «Бадахшон»  Раҳмонқул Раҳмонқулов аз сифати таъмиру навсозии сехҳои матбаа, ки бо қувваи коргарони ҶДММ «Ноширон» аз шаҳри Душанбе анҷом дода шуданд, изҳори қаноатмандӣ карда, гуфт, ки минбаъд кормандони техникию эҷодии рўзнома талош меварзанд, ки маводҳои ҷолиб ва дархури ҷомеаро ба табъ расонда, сари вақт дастраси  хонандагон  гардонанд.

«Қаблан рўзнома дар шаҳри Душанбе нашр гардида, тавассути ронандагони мошинҳои мусофирбар ба шаҳру ноҳияҳо интиқол дода мешуд.  Ин вақти зиёдро мегирифт ва то ба дасти хонанда расидани он  баъзе аз маводҳо аҳамияти худро гум мекарданд. Дар замони муосир ба таври фаврӣ ба дасти хонандагон расондани рўзнома авлавияти хос дорад. Ҳамчунин баъди баҳрабардорӣ қарор додани матбаа рӯзномаҳои вилоятӣ, шаҳру ноҳияҳо хароҷоти камтар масраф мекунанд», — тазаккур дод номбурда.

АКС: АМИТ «Ховар»