Дар Ашт бахшида ба иди касбии кормандони соҳаи тиб ҳамоиш доир шуд

 ДУШАНБЕ, 16.08.2023. /АМИТ «Ховар»/. 18 август дар Тоҷикистон чун рӯзи мавлуди Абӯалӣ ибни Сино ва Рӯзи  кормандони соҳаи тиб эътироф гардидааст. Дар ноҳияи Ашт бахшида ба иди касбии табибон бо иштироки роҳбарият  ва намояндагони мақомоти ҳифзи ҳуқуқ ҳамоиш доир шуд.  Дар ин хусус АМИТ «Ховар» бо истинод ба Хадамоти матбуоти Раиси ноҳия хабар медиҳад.

Иброз гардид, ки Рӯзи касбии кормандони соҳаи тиб бо мавлуди алломаи бузург Абӯалӣ ибни Сино алоқамандӣ дорад. Умед аст, ки шогирдони ин нобиға ҳамарӯза ба хизмати халқ омода буда, баҳри беҳтар кардани сифати хизматрасонии тиббӣ ва беҳдошти ҳифзи саломатии аҳолӣ боз ҳам саъю кӯшиши бештар менамоянд. Пайваста қабул ва амалӣ шудани барномаву стратегияҳо ва санадҳои нави меъёрии ҳуқуқӣ вобаста ба соҳаи тандурустӣ аз таваҷҷуҳи ҳамарӯзаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон шаҳодат медиҳад.

Бояд гуфт, ки сиёсати иҷтимоӣ, махсусан соҳаи тиб ҳанӯз аз оғози соҳибистиқлолии Тоҷикистон дар маркази таваҷҷуҳи Пешвои  миллат ва Ҳукумати мамлакат қарор дошта, барои табибон шароити зарурӣ фароҳам оварда мешавад.

Баъдан ба кормандони соҳаи тиб, ки фаъолияти назаррас доранд, аз тарафи Раиси ноҳия дар фазои тантанавӣ Сипоснома ва туҳфаҳои хотиравӣ тақдим  шуданд.

АКС: Хадамоти матбуоти Раиси ноҳияи Ашт