Лоиҳаи беҳтарсозии вазъи обрасонӣ дар Конибодом самаранок татбиқ мешавад

ДУШАНБЕ, 07.08.2023. /АМИТ «Ховар»/. Дар шаҳри Конибодом ҷараёни татбиқи лоиҳаи беҳтарсозии вазъи обрасонӣ  мавриди таваҷҷуҳи роҳбарияти вилояти Суғд  қарор дода шуд. Дар ин хусус АМИТ «Ховар» бо истинод ба Хадамоти матбуоти Раиси вилояти Суғд хабар медиҳад.

Бояд гуфт, ки дар доираи амалишавии «Барномаи рушди иқтисодӣ ва иҷтимоии шаҳри Конибодом барои солҳои 2021-2025» ва бо мақсади таъмини заминҳои кишоварзии Ҷамоати деҳоти ба номи Р.Ҳамробоев бо оби полезӣ аз ҷониби Ҳукумати Ҷумҳурии Тоҷикистон​ 28 000 метр қубурҳои оҳанини қутрашон 530 мм ҷудо шуда, корҳо дар ин самт идома доранд.​

Зимни шиносоӣ ба роҳбари вилоят маълумот дода шуд, ки дар доираи корҳои сохтмонӣ ва васлкунӣ то имрӯз зиёда аз 9000 метр қубурҳо хобонида шудаанд.

Раиси вилоят ба роҳбарияти шаҳр ҷиҳати анҷоми босифати корҳо дастуру супоришҳои мушаххас дод.​

Дар идома роҳбари вилоят аз майдони пахтазори чанд хоҷагии кишоварзӣ боздид намуда, бо деҳқонон суҳбат намуд.

Таъкид гардид, ки бояд ҳар порча замин самаранок истифода шуда, дар заминҳои холимонда кишти такрорӣ гузаронида шавад.

Тибқи маълумоти расида, аз ҷониби кишоварзони шаҳр то имрӯз​ дар 2736,9 га кишти такрорӣ гузаронида шудааст.

АКС: Хадамоти матбуоти Раиси вилояти Суғд