НИШАСТИ МАТБУОТӢ. Барои пеш бурдани фаъолияти соҳибкории шаҳрвандони бекор қариб 5 миллион сомонӣ кумаки молиявӣ расонида шуд

ДУШАНБЕ, 13.08.2023. /АМИТ «Ховар»/. Ҷиҳати пешбурди фаъолияти соҳибкории шаҳрвандони бекор дар шашмоҳаи аввали соли равон аз ҷониби мақомоти меҳнат ва шуғли аҳолӣ ба 1355 нафар шаҳрвандони бекор қариб  5 миллион сомонӣ кумаки молиявӣ расонида шуд. Чунин иттилоъ дод муовини Вазири меҳнат, муҳоҷират ва шуғли аҳолии Ҷумҳурии Тоҷикистон Қиёмиддин  Давлатзода 10 август зимни нишасти матбуотӣ ба хабарнигорон.

Аз ҷумла, дар Вилояти Мухтори Кӯҳистони Бадахшон ба 195 нафар шаҳрванди бекор 625,7 ҳазор сомонӣ, дар вилояти Суғд ба 460 нафар 1,6 миллион, дар вилояти Хатлон ба 299 нафар 1,3 миллион сомонӣ,  дар шаҳри Душанбе ба 50 нафар 223,0 ҳазор сомонӣ ва дар шаҳру ноҳияҳои тобеи ҷумҳурӣ ба 351 нафар ба андозаи 1,2 миллион сомонӣ кумаки молиявӣ пардохт гардид.

Барои дастгирии соҳибкории занон ва ҷавонон ба 775 нафар занон ба андозаи 2 миллиону 844,3 ҳазор сомонӣ ва ба 508 нафар ҷавонон 1,9 миллион сомонӣ, инчунин ҷиҳати дастгирӣ ва эҳёи намудҳои гуногуни ҳунарҳои мардумӣ ба 501 нафар шаҳрвандон ба андозаи 1,8 миллион сомонӣ кумаки молиявӣ пардохт гардид.

 София ШОИК,
АМИТ «Ховар»

 АКС: АМИТ «Ховар»