Вазорати нақлиёти Тоҷикистон: бар асари бориши шадид ва омадани сел чандин роҳу пулҳо осеб дидаанд

ДУШАНБЕ, 29.08.2023 /АМИТ «Ховар»/. Бар асари бориши зиёди 27 август дар бархе аз минтақаҳои кӯҳсори мамлакат сел омада, чандин роҳу пулҳоро тахриб намуд, хабар медиҳад Вазорати нақлиёти ҷумҳурӣ.

Дар роҳи байналмилалии «Ваҳдат- Рашт-Лахш» дар километрҳои 92-94, 101, 141+800-и ҳудуди ноҳияи Нуробод, дар километри 144-уми ҳудуди ноҳияи Рашт, дар километри 194-и ҳудуди ноҳияи Тоҷикобод ва дар километрҳои 22, 25, 28, 27, 39-и ҳудуди ноҳияи Сангвор сели калонҳаҷм омада, роҳро вайрон ва ҳаракати нақлиётро муваққатан қатъ намуд.

Дар айни замон муассисаҳои нигоҳдории роҳҳои минтақаи Рашт бо истифода аз техникаи муҳандисӣ дар километрҳои 92-94 ва 101- и ноҳияи Нуробод роҳро кушода, ҳаракати ҳама гуна намуди нақлиётро таъмин намуданд. Дар ҳудуди ноҳияи Рашт ва Сангвор низ роҳ қариб тоза шуда, ҳаракати нақлиёт таъмин гардид.

Корҳои бартарафсозии оқибатҳои сел дар роҳу пулҳои мавзеъҳои дигари минтақа идома доранд.

Бояд тазаккур дод, ки ҳамзамон бар асари омадани сел дар ноҳияи Варзоб роҳи байналмилалии Душанбе-Чаноқ дар километрҳои 18, 19, 22, 23, 47, 56 зарари ҷиддӣ дида, ҳаракати нақлиёт муваққатан қатъ гардид. Гуфта мешавад, ки баъд аз корҳои барқароркунӣ ҳаракати нақлиёт дар ин шоҳроҳ барқарор шуд.

АКС аз манбаъҳои боз