Дар Душанбе оид ба вазъи амнияти минтақавӣ дар Осиёи Марказӣ конфронси илмӣ-амалии ҷумҳуриявӣ доир шуд
ДУШАНБЕ, 18.09.2023. /АМИТ «Ховар»/. Имрӯз дар Маркази тадқиқоти стратегии назди Президенти Ҷумҳурии Тоҷикистон бо мақсади натиҷагирӣ аз баргузории Вохӯрии панҷуми машваратии Сарони давлатҳои Осиёи Марказӣ ва ҷаласаи Шурои Сарони давлатҳои муассиси Фонди байналмилалии наҷоти Арал (ФБНА) дар шаҳри Душанбе таҳти унвони «Мониторинги вазъи амнияти минтақавӣ дар Осиёи Марказӣ: ҳолат ва дурнамо» конфронси илмӣ-амалии ҷумҳуриявӣ доир гардид. Дар ин хусус ба АМИТ «Ховар» дар Маркази тадқиқоти стратегӣ хабар доданд.
Директори Маркази тадқиқоти стратегии назди Президенти Ҷумҳурии Тоҷикистон Хайриддин Усмонзода изҳор дошт, ки имрӯз давлатҳои Осиёи Марказиро на танҳо ҷуғрофия ва таърихи умумӣ, балки манфиатҳои муштарак дар соҳаҳои иқтисодӣ, сиёсӣ, амниятӣ ва ғайра муттаҳид месозанд. Ҷумҳурии Тоҷикистон аз ҷумлаи давлатҳои фаъол дар раванди ҳамгироии минтақавӣ ба шумор меравад.
Мавсуф баргузории чунин ҳамоишро барои тақвияти амнияти минтақаи Осиёи Марказӣ, мустаҳкам гардидани ҳамгироӣ байни давлатҳои минтақа ва шарикони стратегии онҳо муҳим унвон намуда, баён дошт, ки «Тоҷикистон ҳамчун бахши ҷудонопазири минтақа нисбат ба равандҳои минтақавӣ ҳаргиз бетафовут нест. Зиёда аз ин, Тоҷикистон давлати фаъоли минтақа ва ташаббускор дар равандҳои ҳамгироии минтақавӣ ба шумор меравад. Дар сиёсати хориҷии бисёрсамтии Ҷумҳурии Тоҷикистон тайи 32 соли Истиқлолияти давлатӣ ба рушди ҳамкорӣ дар минтақа аҳаммияти аввалиндараҷа дода мешавад»,-афзуд директори Марказ.
Таъкид гардид, ки дар амалияи сиёсати хориҷии Тоҷикистон зери мафҳуми «минтақа» ба таври анъанавӣ, пеш аз ҳама, давлатҳои Осиёи Марказӣ дар назар дошта шудааст. Дар санадҳои расмии соҳа дар ин бора таъкид мегардад, ки таҳкими муносибатҳои дуҷониба бо давлатҳои Осиёи Марказӣ, аз ҷумла Қазоқистон, Туркманистон, Узбекистон ва Қирғизистон бояд ҳамеша аз рӯйи эътимод, дӯстӣ ва ҳамкории судманд ба роҳ монда шавад.
Ҳамзамон изҳор шуд, ки ҳадафҳо ва вазифаҳои муштарак дар минтақа давлатҳоро водор месозанд, ки бо истифода аз зарфияти ҳар давлати минтақа барномаҳо ва стратегияҳои муштаракро дар самтҳои сиёсӣ, иқтисодӣ ва амниятӣ коркард намуда, бо дарназардошти манфиатҳои кишварҳои ҳамсоя сиёсати созанда ва устуворро пеша намоянд.
Дар конфронс масъалаҳои зерин, аз ҷумла вазъи амнияти минтақаи Осиёи Марказӣ: ҳолат ва дурнамо, натиҷаи мулоқоти душанбегии Сарони давлатҳои Осиёи Марказӣ, мавқеъ ва ҳамкории давлатҳои минтақа дар мубориза бо таҳдидҳои замони муосир; Тоҷикистон ҳамчун сипари боэътимоди минтақа, вазъ ва дурнамои амнияти иқтисодии Осиёи Марказӣ, дурнамои таъмини амнияти энергетикии мамлакатҳои минтақа мавриди баррасӣ ва арёзбӣ қарор гирифтанд.
АКС: Хадамоти матбуоти Маркази тадқиқоти стратегии назди Президенти Ҷумҳурии Тоҷикистон








Байни Тоҷикистон ва Амороти Муттаҳидаи Арабӣ Ёддошти тафоҳум оид ба эътирофи мутақобили шаҳодатномаҳои ронандагӣ ба имзо расид
Дар Прокуратураи генералӣ Рӯзи Президентро таҷлил намуданд
Нақшаи даъвати тирамоҳии шаҳрвандони Тоҷикистон ба сафи Артиши миллӣ пурра иҷро шуд
80 корманди мақомоти корҳои дохилӣ бо манзили зист таъмин мешаванд
Соли 2027 Тоҷикистон раёсатро дар Созмони Аҳдномаи амнияти дастҷамъӣ ба уҳда мегирад
Ҳабибулло Воҳидзода бо сафири навтаъйини Беларус дар Тоҷикистон мулоқот намуд
Эмомалӣ Раҳмон: «Ҳар корманди милитсия бояд бо рафтору гуфтор, дониш, самимияту эътимод сазовори боварии шаҳрвандон бошад»
Дар Роғун Рӯзи милитсияи тоҷикро таҷлил намуданд
Дар Суғд Рӯзи милитсияи тоҷикро ботантана таҷлил намуданд
Дар 26 шаҳру ноҳияи Тоҷикистон шуъбаҳои Вазорати корҳои дохилӣ бо биноҳои замонавӣ таъмин шуданд
Рӯзи милитсияи тоҷик дар Вилояти Мухтори Кӯҳистони Бадахшон ботантана таҷлил гардид
10 НОЯБР — РӮЗИ МИЛИТСИЯИ ТОҶИК. Барои беҳтар намудани шароити хизмат дар мақомоти корҳои дохилӣ беш аз 1500 иншоот бунёд гардидааст






