Варзишгарони тоҷик дар Чемпионати 13-уми ҷаҳон — карате шотокан 7 медал ба даст оварданд

ДУШАНБЕ, 12.09.2023. /АМИТ «Ховар»/. Аз 8 то 10 сентябр дар шаҳри Тошканди Ҷумҳурии Узбекистон Чемпионати 13-уми ҷаҳон — карате шотокан баргузор гардид, ки дар он варзишгарони тоҷик соҳиби 7 медал, аз ҷумла 1 тилло, 4 нуқра ва 2 биринҷӣ шуданд. Дар ин хусус ба АМИТ «Ховар» дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Аз ҷумла, Абдулваҳоб Шарапови 18-сола дар вазни 65 кг соҳиби ҷойи якум гардида, Нигина Хайруллоева байни собиқадорони 35-44-сола соҳиби ҷойи 2-юм шуд.

Инчунин Алиҷон Саримсоқов байни собиқадорони 35-44 ва Юнусҷон Негматов байни варзишгарони 10-11-сола дар вазни -34 кг, Оиша Баёдова дар байни варзишгорони 7-9 сола дар вазни -25 кг соҳиби ҷойи 2-юм шуданд.

Варзишгарон Маҳзатулло Муминов ва Алиҷон Саримсоқов байни собиқадорон соҳиби ҷойи 3-юм гардиданд.

Ба ифтихори дастоварди варзишгарони мамлакат Парчами Ҷумҳурии Тоҷикистон баланд бардошта шуда, Суруди миллӣ садо дод.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон