Ҳайати расмии Беларус бо Ҷамъияти саҳомии пӯшидаи «Агротехсервис»-и шаҳри Ҳисор шинос гардид

ДУШАНБЕ, 02.10.2023 /АМИТ «Ховар»/. Ҳайати расмии Комиссияи муштараки байниҳукуматии Тоҷикистону Беларус ва Вазири кишоварзӣ ва озуқавории Беларус Сергей Бартош 29 сентябр ба шаҳри Ҳисор рафта, бо Ҷамъияти саҳомии пӯшидаи «Агротехсервис», ки фаъолияти он ба насбу васли тракторҳо ва истеҳсоли дигар таҷҳизоту техникаҳои кишоварзии беларусӣ нигаронида шудааст, шинос шуд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Ҳисор хабар медиҳад.

Навбати аввали корхонаи муштараки Ҷамъияти саҳомии пӯшидаи «Агротехсервис» 16 май ва навбати дуюмаш 29 сентябри соли 2018 бо иштироки Сарони давлатҳои Тоҷикистон ва Беларус муҳтарам Эмомалӣ Раҳмон ва Александр Лукашенко ба истифода дода шудааст.

Имрӯз шуҳрати корхона меафзояд ва фаъолияти он на танҳо барои Тоҷикистон, балки кишварҳои минтақа, ки асоси рушди иқтисодии онҳоро соҳаи кишоварзӣ ташкил медиҳад, манфиат дорад. Ҳамзамон таъкид гардид, ки саҳми корхона дар рушди иқтисодии шаҳр назаррас буда, василае аст барои пайванди риштаҳои дӯстии мардумони тоҷику беларус.

Ҳамчунин бо иштироки меҳмонон дар боғи зимистонаи шаҳри Ҳисор барномаи фарҳангии «Шоми дӯстӣ» доир гардида, ҳунармандони бахши фарҳанги шаҳр барномаи рангини консертиро бо суруду таронаҳои тоҷикӣ ва беларусӣ пешкаши меҳмонон намуданд.

АКС: Мақомоти иҷроияи ҳокимияти давлатии шаҳри Ҳисор