Дар Тоҷикистон 82 лоиҳаи сармоягузории давлатӣ амал менамояд

ДУШАНБЕ, 12.10.2023. /АМИТ «Ховар»/. Маҷмуи лоиҳаҳои сармоягузории давлатии амалкунанда дар Тоҷикистон 82 ададро ташкил медиҳад, ки маблағи умумии онҳо 49,11 миллиард сомонӣ мебошад. Аз инҳо 50 лоиҳаи грантӣ, 4 лоиҳаи қарзӣ ва 28 лоиҳа дар ҳаммаблағгузорӣ аз қарз ва грант иборат мебошад. Дар ин хусус ба АМИТ «Ховар» дар Кумитаи давлатии самроягузорӣ ва идораи амволи Ҷумҳурии Тоҷикистон хабар доданд.

Дар таркиби маҷмуи лоиҳаҳои амалкунанда маблағҳои грантӣ 33,0 миллиард сомонӣ ё 67,1 фоиз, маблағҳои қарзӣ 14,6 миллиард сомонӣ ё 29,7 фоиз, саҳми Ҳукумати Ҷумҳурии Тоҷикистон 1,3 миллиард сомонӣ  ё 2,6 фоиз, инчунин дигар сарчашмаҳо ҳастанд.

Аз ҷумла, саҳми корхонаҳои давлатии ҷумҳурӣ, мақомоти иҷроияи маҳаллии ҳокимияти давлатӣ, ҷамоаҳо ва ғайра 62,2 миллион сомонӣ ё 0,1 фоизро ташкил медиҳад.

Дар доираи лоиҳаҳои давлатии сармоягузории амалкунанда аз оғози татбиқ 21,4 миллиард сомонӣ маблағҳо барои хариди мол, иҷрои кор ва хизматрасонӣ аз худ гардидаанд.

АКС аз манбаъҳои боз