Намояндагони корпуси дипломатӣ ва созмонҳои байналмилалӣ бо Парки табиӣ-таърихии «Ширкент» шинос шуданд

ДУШАНБЕ,17.10.2023/АМИТ «Ховар»/. Ҳукумати Ҷумҳурии Тоҷикистон ба масъалаҳои экологӣ ва ҳифзи манотиқи табиӣ таваҷҷуҳи хосса зоҳир намуда, барои ҳифзи олами набототу ҳайвоноти он тадбирҳои муассир меандешад. Чунин гуфт Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода дар ҷамъомади тантанавие, ки бахшида ба 30-солагии таъсиси Парки табиӣ-таърихии «Ширкент» дар дараи Ширкент баргузор гардид. АМИТ «Ховар» бо истинод ба Кумитаи ҳифзи муҳити зисти назди Ҳукумати ҷумҳурӣ иттилоъ медиҳад, ки дар ҷамъомади тантанавӣ роҳбарони вазорату идораҳои ҷумҳурӣ, намояндагони корпуси дипломатӣ ва созмонҳои байналмилалии муқими Тоҷикистон иштирок намуданд.

Таъкид шуд, ки Парки табиӣ – таърихии «Ширкент» бо қарори Ҳукумати Ҷумҳурии Тоҷикистон 12 сентябри соли 1993 бо мақсади ҳифзу нигоҳдории генафонди беҳамтои олами ҳайвоноту наботот, инчунин нигоҳ доштани изҳои динозавр ва рушди сайёҳии экологӣ дар майдони 3000 гектар ташкил гардидааст.

Дар идомаи чорабинии ҷашнӣ барои меҳмонон барномаи ҷолиб ва намоиши мусаввараҳои олами бойи набототу ҳайвоноти Тоҷикистон ташкил шуда, имконияти сайёҳии фарҳангӣ, кӯҳнавардӣ ва экологии шаҳри Турсунзода, бахусус дараи Ширкент ба маърази тамошои меҳмонон гузошта шуд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон