Нишондиҳандаи кӯтоҳмуддати рушди минтақавии вилояти Хатлон 8,2 фисад афзоиш ёфтааст

ДУШАНБЕ, 17.10.2023. /АМИТ «Ховар»/. Дар натиҷаи андешидани тадбирҳои судманд ва бо истифода аз захираю имконияти мавҷуда дар вилояти Хатлон натиҷаҳои рушди минтақавӣ 8,2 фоиз афзоиш ёфтааст. Дар ин хусус ба АМИТ «Ховар» дар Мақомоти иҷроияи ҳокимияти давлатии вилояти  Хатлон хабар доданд.

Дар 9 моҳи соли равон нишондиҳандаи кӯтоҳмуддати рушди минтақавии вилояти Хатлон ба 23 миллиарду 655,9 миллион сомонӣ расид, ки дар маҷмуи нишондиҳандаҳои кӯтоҳмуддати рушди иқтисодӣ 26,3%-и ҳиссаи ҷумҳуриро ташкил медиҳад.

Дар ин давра нақшаи андоз бо назардошти андози иҷтимоии ғайрибуҷетӣ 103,6% таъмин гардида, ба буҷет 1 миллиарду 745,2 миллион сомонӣ маблағ ворид шуд, ки нисбат ба нақшаи тасдиқгардида 60,2 миллион сомонӣ зиёд мебошад.

Саҳми шаҳру ноҳияҳои Бохтар, Кӯлоб, Норак, Шамсиддини Шоҳин, Темурмалик, Фархор, Ҷалолиддини Балхӣ, Балҷувон, Данғара, Дӯстӣ, Шаҳритус ва Восеъ дар иҷрои нақшаи андозҳо чашмрас мебошад. Масъулини ин шаҳру ноҳияҳо нақшаи қисми даромади буҷетро сари вақт таъмин ва маблағҳои барзиёди буҷетро барои хуррамгардонию боз ҳам зебо гардонидани симои шаҳраку деҳот, сохтмону таҷдиди роҳҳо, чароғонкунӣ ва дигар ободкориҳо равона намудаанд.

АКС: Мақомоти иҷроияи ҳокимияти давлатии вилояти  Хатлон