Ҷавонон ва волонтёрони фаъол ба дидорбинии иштирокчиёни Иҷлосияи XVI Шурои Олии Ҷумҳурии Тоҷикистон рафтанд

ДУШАНБЕ, 17.11.2023. /АМИТ «Ховар»/. Бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба муносибати 31-солагии Иҷлосияи XVI Шурои Олии Ҷумҳурии Тоҷикистон як гурӯҳ ҷавонон ва волонтёрони фаъол ба дидорбинии иштирокчиёни ин иҷлосия рафтанд. Дар ин хусус ба АМИТ «Ховар» дар Кумитаи кор бо ҷавонон ва варзиш хабар доданд.

Зимни суҳбати самимӣ изҳор дошта шуд, ки Иҷлосияи XVI Шурои Олии Ҷумҳурии Тоҷикистон дар таърихи халқи тоҷик роҳу самтҳои инкишофи ояндаи иҷтимоиву иқтисодӣ, сиёсӣ ва маънавии ҷумҳуриро равшан намуд. Ҷумҳурии Тоҷикистон зери роҳбарии Президенти Тоҷикистон муҳтарам Эмомалӣ Раҳмон ба сулҳу суботи воқеӣ расида, имрӯз амнтарин давлати дунё эътироф шуд.

Дар навбати худ иштирокчиёни иҷлосия аз ҷонфидоиҳои Президенти Тоҷикистон ёдовар шуда, ҷавононро ҳидоят намуданд, ки ба қадри ободӣ, шукуфоӣ, пешрафти ояндаи Тоҷикистон расанд ва Ватанро самимона дӯст доранд.

Онҳо пешниҳод намуданд, ки ҷавонон дар ободии давлат ва ояндаи пурнишоти он пайваста саҳм гузоранд, оромиву суботи ҷомеаро ҳифз намуда, обрӯ ва эътибори Тоҷикистонро дар арсаи байналмилалӣ баланд бардоранд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон