Бинои шуъбаи Вазорати корҳои дохилӣ дар ноҳияи Фархор таъмиру навсозӣ карда шуд

ДУШАНБЕ, 09.11.2023. /АМИТ «Ховар»/. Бахшида ба Рўзи милитсияи тоҷик бинои маъмурии шуъбаи Вазорати корҳои дохилии Ҷумҳурии Тоҷикистон дар ноҳияи Фархор баъди таъмиру  навсозӣ мавриди истифода қарор дода шуд, хабар дод ба АМИТ «Ховар» котиби матбуоти Раиси ноҳияи Фархор Абдураҳмон Муҳидов.

Бинои мазкур бо дастгирии Мақомоти иҷроияи ҳокимияти давлатии ноҳияи Фархор  ва соҳибкорони  саховатпешаи ноҳия пурра таъмиру навсозӣ гардида, дар он барои кормандон шароити мусоиди корӣ  фароҳам оварда шудааст.

Дар маросими ифтитоҳи бинои нав оид ба беҳгардонии шароити кору зиндагӣ, сайқал додани  маҳорати касбӣ ва хизмати содиқонаи кормандони мақомоти корҳои дохилӣ ибрози андеша карда шуд.

Гуфта шуд, ки таъмини фазои орому босубот, ҳифзи пойдории сулҳу ваҳдат ва тартиботу амнияти ҷомеа дар мамлакат  аз фаъолияти самарабахшу ватандўстонаи ҳар як корманди мақомоти корҳои дохилӣ  вобаста аст.

Таъкид гардид, ки  кормандони мақомоти корҳои дохилӣ бояд ҳамеша бо мардум бошанд, бо халқ муомила ва ҳамкории хуб дошта, бо рафтору кирдори нек, интизоми баланди хизматӣ, такмили пайвастаи малака ва маҳорати касбии худ эътибору нуфузи намояндаи ҳокимиятро нигоҳ доранд ва дар роҳи риояи қонуният худашон намуна бошанд.

Тавре Президенти мамлакат муҳтарам Эмомалӣ Раҳмон дар яке аз суханрониҳояшон бахшида ба Рўзи милитсия иброз доштанд: «Милитсия симои давлату давлатдорист ва бо вайронкунандагони қонуният ва тартиботи ҷамъиятӣ оштинопазир мебошад. Итминон дорам, ки аз афсарони баландрутба то хизматчиёни қаторӣ минбаъд низ барои ҳифзи тартибот, таъмини зиндагии осоиштаи мардум, пуштибонии сулҳу субот ва таҳкими волоияти қонун дар ҷомеа нерўи маънавию ҷисмонӣ, маҳорати касбӣ ва донишу малакаи худро дареғ намедоранд ва ба халқу Ватани азизамон беғаразона, бо дасту дили пок ва содиқонаву софдилона хизмат менамоянд».

АКС: Мақомоти иҷроияи ҳокимияти давлатии ноҳияи Фархор