Дар Кӯлоб нақши воситаҳои ахбори оммаро дар таъмини амнияти иттилоотӣ баррасӣ намуданд

ДУШАНБЕ, 11.11.2023 /АМИТ «Ховар»/. Дар Донишгоҳи давлатии Кӯлоб ба номи Абуабдуллоҳи Рӯдакӣ Конференсияи ҷумҳуриявии илмӣ-назариявӣ дар мавзуи «Нақши воситаҳои ахбори омма дар таъмини амнияти иттилоотии Ҷумҳурии Тоҷикистон» баргузор гардид, хабар медиҳад мухбири минтақавии АМИТ «Ховар».

Дар конференсия таъкид гардид, ки дар ҷомеаи демократӣ матбуот аз воситаҳои асосии таъсиррасонӣ ба афкори ҷомеа буда, нақши он баҳри расонидани иттилооти воқеӣ, раванди демократикунонӣ ва ташаккули афкори ҷомеа хеле муҳим арзёбӣ мегардад.

Иброз карда шуд, ки дар раванди ҷаҳонишавӣ яке аз вазифаҳои асосии воситаҳои ахбори омма ин баланд бардоштани худшиносии миллӣ ва ватандӯстӣ, дастгирӣ ва рушди анъанаҳои асил ва фарҳанги миллии тоҷикистониён мебошад.

«Матбуот ҳамчун инъикосгари манфиатҳои давлат, бояд воситае бошад байни ҷомеаи шаҳрвандиву ниҳодҳои иҷтимоии ҷомеа, чунки он ба ҳайси оинаи миллат дар баррасиву муаррифии тамоми паҳлуҳои ҳаёти ҷомеа нақши калидӣ дорад. Матбуот қодир аст бо сухани созандаву саривақтӣ ва саҳеҳу нишонрас рисолати худро дар назди халқу Ватан сарбаландона иҷро намояд»,-изҳор гардид дар ҷамъомад.

Сипас дар конференсия доир ба «Амнияти иттилоотӣ ва нақши ВАО: ҳақиқат ва қиёс», «Воситаҳои ахбори оммаи маҳаллии Тоҷикистон дар шароити ҷаҳонишавӣ» ва дигар мавзуъҳои ба ин масъала дахлдор маърӯзаҳо ироа гардида, гуфта шуд ки «ҷанбаи созандагии воситаҳои ахбори омма дар он ифода меёбад, ки соҳаҳои гуногуни ҷомеаро ба ҳам оварда, онҳоро дар арсаи байналмилалӣ муаррифӣ менамояд. Инчунин имконияти фаровон дорад, ки дар самти ташаккули шахсиятҳои комилу созандаи ҷомеа нақши муҳим бозида, ҳамзамон ҳар як фардро алоҳида дар рӯҳияи ватандӯстӣ, посдории асолатҳои миллӣ ва меҳнатпарварӣ тарбия намояд».

АКС: Донишгоҳи давлатии Кӯлоб ба номи Абуабдуллоҳи Рӯдакӣ