Дар Суди Олии иқтисодӣ Рӯзи Парчами давлатиро бо баргузории ҳамоиши тантанавӣ таҷлил намуданд

ДУШАНБЕ, 24.11.2023 /АМИТ «Ховар»/. «Парчам – рамзи ҳастии миллат ва давлати Тоҷикистон»- таҳти чунин унвон 23 ноябр дар Суди Олии иқтисодии Ҷумҳурии Тоҷикистон бахшида ба Рӯзи Парчами давлатӣ ҳамоиш баргузор гардид, хабар медиҳад мухбири АМИТ «Ховар».

Тавре Раиси Суди Олии иқтисодӣ Рустам Мирзозода иброз намуд, «Рӯзи Парчами давлатӣ аз ҷумлаи ҷашнҳое мебошад, ки  имрӯз симои Тоҷикистонро ҳамчун давлати соҳибистиқлол, муқтадир, бофарҳанг ва соҳиби тамаддуни бой  дар ҷаҳон  муаррифӣ менамояд. Рамзҳое, ки дар  Парчами Тоҷикистон интихоб шудаанд, ҳар кадоме   мазмуну муҳтавои амиқ доранд, ки  дар онҳо, агар  аз як тараф, гузаштаи мамлакати мо, яъне принсипи таърихият ба  эътибор гирифта шуда бошад, аз тарафи дигар, меросбарии арзишҳои  фарҳангию ахлоқӣ, маънавию илмӣ ва  арзишҳои дигаре, ки дар гузашта мавҷуд буданд ва мо имрӯз ба онҳо арҷ мегузорем, ифода ёфтаанд».

Судяи Суди Олии иқтисодии Ҷумҳурии Тоҷикистон Қутбиддин Муминзода аз он ёдовар шуд,  ки бо ташаббуси Президенти Ҷумҳурии Тоҷикистон муҳтарам Эмомалӣ Раҳмон 30 августи соли 2011 Парчами давлатии Тоҷикистон  бо баландии рекордӣ, яъне 165 метр барафрохта шуд, ки бо ин ба китоби «Рекордҳои Гиннес» ворид шуд.

«Парчами миллӣ рамзи Истиқлолияти давлатии Ҷумҳурии Тоҷикистон буда, шаҳрвандонро ба зиндагии ором, сулҳу осоиш, талош ба хотири ҳаёти арзанда ва соҳибихтиёрию соҳибдавлатӣ равона менамояд», — афзуд Қутбиддин Муминзода.

Ҳамзамон дар ҳамоиш гуфта шуд, ки ҳар шаҳрванди Ҷумҳурии Тоҷикистон масъул ва вазифадор аст, ки Парчами давлатии мамлакатро эҳтиром намояд ва ба инрукни муқаддас арҷ гузорад. Зеро, арҷгузорӣ ба муқаддасоти миллӣ- ин эҳтиром ба миллат ва давлати хеш мебошад.

АКС: АМИТ «Ховар»