Дар вилояти Суғд дурнамои ҳамкорӣ бо Фаронса баррасӣ шуд

ДУШАНБЕ, 11.11.2023 /АМИТ «Ховар»/. Раиси вилояти Суғд Раҷаббой Аҳмадзода бо Сафири Фавқулода ва Мухтори Ҷумҳурии Фаронса дар Ҷумҳурии Тоҷикистон Элза Пинёл мулоқот намуда, таваҷҷуҳи дипломати фаронсавиро  ба вазъи иқтисодиву иҷтимоии вилоят ҷалб намуда, доир ба имконияти фаровони вилоят маълумот дод. Дар ин хусус АМИТ «Ховар» бо истинод ба Хадамоти матбуоти Раиси вилояти Суғд хабар медиҳад.

Зимни суҳбат таъкид гардид, ки бо сиёсати пешгирифтаи  Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Фаронса Эманнуэл Макрон ҷонибҳо дар​ бахшҳои гуногун ҳамкории судманд доранд. Аз ҷумла, дар соҳаи маориф робитаҳои ду давлат дар сатҳи баланд қарор дошта, дар шаҳри Хуҷанд низ ташкилоти ҷамъиятии «Маркази фарҳангии Фаронса»​ фаъолият мебарад. Ҳамзамон муассисаҳои таҳсилотии олии вилоят бо якчанд  донишгоҳҳои Фаронса ҳамкорӣ менамоянд.

Тазаккур дода шуд, ки дар вилояти Суғд соҳаҳои саноату кишоварзӣ рушд намуда, барои ташкили корхонаҳои муштарак ва боғу токзор ва гармхонаҳои инноватсионӣ имконият зиёд аст. Тарафҳо метавонанд барои ҷалби сармоя ва коркарду содироти маҳсулоти аз ҷиҳати экологӣ тозаи Тоҷикистон тарҳҳои муфидро амалӣ созанд.​ ​

Тавсеаи ҳамкорӣ дар бахшҳои​ энергетика, металлургия, саноати сабук, истихроҷи канданиҳои фоиданок ва сайёҳӣ муҳим шуморида шуд.

Сафири Фавқулода ва Мухтори Ҷумҳурии Фаронса дар Ҷумҳурии Тоҷикистон Элза Пинёл бо изҳори сипос аз истиқболи самимӣ омодагии худро барои густариши ҳамкорӣ таъкид намуд.

Ӯ ҳамзамон илова намуд, ки барои вусъат бахшидани фаъолияти дуҷониба​ ташкили вохӯрии соҳибкорони Тоҷикистон ва Фаронса муҳим буда, дар ин ҷода тадбирҳои зарурӣ амалӣ мешаванд.

Мулоқоти ҷонибҳо бо баррасии дурнамои ҳамкорӣ ба анҷом расид.

АКС: Хадамоти матбуоти Раиси вилояти Суғд