Донишгоҳи давлатии омӯзгории Тоҷикистон олимони варзидаро ба таълифи китобҳои дарсӣ даъват менамояд

ДУШАНБЕ, 15.11.2023. /АМИТ «Ховар»/. Донишгоҳи давлатии омӯзгории Тоҷикистон ба номи Садриддин Айнӣ бо мақсади баланд бардоштани сатҳу сифати дониши донишҷӯён,  ҳамзамон таъмин намудани онҳо бо маводи таълимӣ ва таълифи китобҳои дарсӣ барои муассисаҳои таҳсилоти олию миёнаи касбӣ олимону муҳаққиқон ва омӯзгорони варзидаро ба ҳамкорӣ даъват менамояд, хабар медиҳад АМИТ «Ховар» бо истинод ба донишгоҳ.

Хоҳишмандон аз вазорату идораҳо, Академияи миллии илмҳои Тоҷикистон, Академияи миллии таҳсилот, муассисаҳои таҳсилоти олӣ ва миёнаи касбии мамлакат, ҳамчунин шахсоне, ки таҷрибаи таълифи китобҳои дарсӣ доранд, метавонанд ҷиҳати бастани шартнома ба раёсати донишгоҳ муроҷиат намоянд.

Илова бар ин, китобҳои таълифшуда аз ҳисоби раёсати донишгоҳ ройгон интишор гардида, ба муаллифон ҳаққи қалам (гонорар) дода мешавад. Дархостҳо ҷиҳати таълифи китобҳои дарсӣ то 30 ноябри соли 2023 қабул мешаванд. Рӯйхати фанҳое, ки бояд аз рӯи онҳо китоби дарсӣ навишта шавад, замима мегардад.

Хоҳишмандон метавонанд барои пайдо намудани маълумоти иловагӣ ба суроғаи шаҳри Душанбе, хиёбони Рӯдакӣ 121 ва бо телефони 2242012 муроҷиат намоянд.

АКС: Донишгоҳи давлатии омӯзгории Тоҷикистон ба номи Садриддин Айнӣ