ПАРЧАМИ ПИРӮЗИИ МО. Дар Норак ва Рашт ба рукни муқаддас — Парчами давлатии Тоҷикистон арҷ гузошта шуд

РАШТ, 24.11.2023 /АМИТ «Ховар»/. Дар шаҳри Норак ва ноҳияи Рашт Рӯзи Парчами давлатии Ҷумҳурии Тоҷикистон  бо шаҳомати хосса ва арҷи зиёд нисбат ба ин рукни муқаддас таҷлил гардид. Ба ифтихори ин ҷашни таърихӣ сокинону фаъолон ва ҷавонону сарбозони қисмҳои низомии  ин шаҳру ноҳия бо бардоштани парчами давлатӣ ва шиорҳои ватандӯстона роҳпаймоӣ баргузор намуданд, хабар медиҳад мухбири минтақавии АМИТ «Ховар» Субҳониддини Маҳмуд.

Дар ҳамоишҳо  бахшида ба Рӯзи Парчами давлатии Ҷумҳурии Тоҷикистон  иброз гардид, ки Парчами давлатӣ нишон аз давлату давлатдорӣ, иттиҳоду иттифоқи миллати тоҷик, рамзи қудрату тавоноӣ, ифтихор аз Ватану ватандорӣ ва муқаддасоти миллии мо буда, дар худ ормонҳои дирӯзу имрӯз ва фардои дурахшони миллати соҳибтамаддуну шарафманди тоҷикро ифода намудааст.

Имрӯз сокинони Тоҷикистони соҳибистиқлол Рӯзи Парчами давлатиро бо ифтихору шукргузорӣ аз давлату давлатдории миллӣ ва дар фазои орому осудаи мамлакат таҷлил менамоянд. Собиқадорону фаъолон Рӯзи Парчами давлатии Ҷумҳурии Тоҷикистонро ба тамоми сокинон сидқан табрик гуфта, таманно намуданд, ки ин рамзи муқаддаси давлатдории миллӣ дар фазои сулҳу суботи Ватани азизамон ҳамеша парафшон бошад ва мардуми моро ба сӯи ояндаи дурахшон ва музаффарияти нав ба нав раҳнамун созад.

Гуфта шуд, ки парафшон гардидани парчам нишони давлатдорӣ буда, аз устувории пояи ваҳдату иттиҳод ва якдилии сокинон шаҳодат медиҳад. Эҳтироми парчам эҳтиром нисбат ба миллат, таърих ва дигар муқаддасоти мамлакат аст. Ҷунбиши руҳнавози парчам дилро ба ваҷд меоварад ва аз тамошои он оташи меҳру муҳаббат нисбат ба Ватан фурӯзон мегардад. Барафрошта шудани парчам дар ҳар нуқтаи марзу бум далели сарбаландӣ ва шаъну шукуҳи миллат аст.

Мавриди тазаккур аст, ки раванди қабули Парчами давлатии Ҷумҳурии Тоҷикистон дар замони бисёр ҳассос ва вазъи душвори сиёсию иқтисодии мамлакат, ки хатари аз байн рафтани миллат ва давлати тоҷикон таҳдид менамуд, доир шуд. Бо вуҷуди ин Роҳбари тозаинтихоби давлати соҳибистиқлоли Тоҷикистон муҳтарам Эмомалӣ Раҳмон дар роҳи қабули муқаддасоти миллӣ ва ба ин васила, муттаҳид сохтани тарафҳои даргир қадамҳои устувор гузоштанд. Ҳамин буд, ки дар Иҷлосияи XVI Шурои Олии Ҷумҳурии Тоҷикистон 24 ноябри соли 1992 дар баробари ҳалли дигар масоили барои аз вартаи ҳалокат наҷот додани давлату миллати тоҷикон ниҳоят зарурӣ Парчами давлатии Ҷумҳурии Тоҷикистон низ тасдиқ шуд.

Мояи ифтихор ва сарфарозӣ аст, ки ин рукни муқаддаси миллӣ тавонист мардуми парокандаи мамлакатро дар зери худ муттаҳид ва орзуву ормонҳои ҳазорсолаи миллати тоҷикро амалӣ намояд.

АКС: Мақомоти иҷроияи ҳокимияҳои давлатии ноҳияи Рашт ва шаҳри Норак