ПЕШГӮИИ ОБУҲАВОШИНОСОН: Дар даҳаи дуюми моҳи ноябр ҳарорати ҳаво рӯ ба пастшавӣ меорад

ДУШАНБЕ, 02.11.2023. /АМИТ «Ховар»/. Ҳавои моҳи ноябри имсола ба обу ҳавои моҳи ноябри соли 2015 монанд мешавад. Даҳаи аввали моҳ ҳарорати миёнаи моҳонаи ҳаво дар ҳудуди меъёри иқлимӣ пешгӯӣ шуда, дар водиҳо 8+10 ва дар ноҳияҳои доманакӯҳ 6+7 дараҷа гармиро ташкил медиҳад. Даҳаи дуюми моҳ пастшавии ҳарорати ҳаво дар назар аст. Давоми моҳ тағйирёбии ҳарорати ҳаво пешгӯӣ шуда, дар баъзе ноҳияҳо шабона аз 3-8 то 10-15 ва дар рӯзҳои алоҳида то 15-20 дараҷа хунукӣ дар назар дошта шудааст. Дар ин хусус ба АМИТ «Ховар» дар Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон хабар доданд.

Дар ин давра дар вилояти Хатлон ва водиҳои ноҳияҳои тобеи ҷумҳурӣ ҳарорати миёнаи моҳонаи ҳаво дар ҳудуди меъёри иқлимӣ пешгӯӣ шуда, дар водиҳо 8+10 ва дар ноҳияҳои доманакӯҳ 6+7 дараҷа гармиро ташкил медиҳад. Дар нимаи аввали моҳ ҳарорати бартариятдоштаи ҳаво шабона 7+12 ва рӯзона 18+23 дараҷа гарм пешгӯӣ мешавад. Дар даҳрӯзаи дуюм ва сеюми моҳ шабона 2+7 ва рӯзона 11+16 дараҷа гармӣ дар назар дошта шудааст. Дар рӯзҳои алоҳида пастшавии ҳарорати ҳаво пешгӯӣ  шуда, шабона аз 1 дараҷа хунук то 4 дараҷа гарм ва рӯзона то 6+11 дараҷа гармӣ дар назар дошта шудааст. Ҳамчунин дар нимаи дуюми моҳ ба амал омадани борон ва  барфи тар аз эҳтимол дур нест.

Миқдори моҳонаи бориши атмосферӣ дар водиҳо дар ҳудуди меъёри иқлимӣ ва дар баъзе ноҳияҳо аз меъёри иқлимӣ зиёд пешгӯӣ мешавад. Рӯзҳои алоҳида дар баъзе ноҳияҳо шиддатёбии вазиши шамол бо суръати то 15-20 метр дар як сония пешгӯӣ шуда, дар ноҳияҳои алоҳида туман мефарояд.

Дар вилояти Суғд ҳарорати миёнаи моҳонаи ҳаво дар бештари ноҳияҳо дар ҳудуди меъёри иқлимӣ пешгӯӣ шуда, дар водиҳо 6+7 ва дар ноҳияҳои кӯҳӣ аз 1 дараҷа хунук то 2 дараҷа гармиро ташкил медиҳад. Дар даҳрӯзаи аввали моҳ ҳарорати бартариятдоштаи ҳаво дар водиҳо шабона 5+10 ва рӯзона 12+17 дараҷа гарм, дар ноҳияҳои кӯҳӣ шабона 0+5 ва рӯзона 9+14 дараҷа гарм пешгӯӣ мешавад.

Дар даҳрӯзаҳои дуюм ва сеюми моҳ дар водиҳо шабона 2+7 ва рӯзона 8+13 дараҷа гарм, дар ноҳияҳои кӯҳӣ  шабона аз 4 дараҷа хунук то 1 дараҷа гарм, рӯзона 4+9 дараҷа гарм мешавад. Дар рӯзҳои алоҳида пастшавии ҳарорати ҳаво дар назар буда, дар водиҳо шабона то -1+4 дараҷа ва рӯзона то 3+8 дараҷа гарм мешавад.  Ба амал омадани борон ва барфи шиддатнокиашон гуногун дар нимаи дуюми моҳ аз эҳтимол дур нест.

Дар минтақаҳои кӯҳии ноҳияҳои тобеи ҷумҳурӣ ва ғарби Вилояти Мухтори Кӯҳистони Бадахшон ҳарорати миёнаи моҳонаи ҳаво дар ҳудуди  меъёри иқлимӣ пешгӯӣ шуда, 1+6 дараҷа гармиро ташкил медиҳад. Дар даҳрӯзаи аввали моҳ ҳарорати бартариятдоштаи ҳаво шабона 2+7 ва рӯзона 11+16 дараҷа гармиро ташкил медиҳад. Дар даҳрӯзаҳои дуюм ва сеюми моҳ шабона аз 3 дараҷа хунук то 2 дараҷа гарм ва рӯзона 6+11 дараҷа гармӣ дар назар аст. Дар рӯзҳои алоҳида пастшавии ҳарорати ҳаво пешгӯӣ шуда, шабона 3-8 дараҷа хунук, рӯзона аз 1 дараҷа хунук то 4 дараҷа гарм мешавад. Ба амал омадани бориши атмосферии шиддатнокиашон гуногун (дар намуди барф) дар нимаи дуюми моҳ аз эҳтимол дур нест.

Дар Шарқи Вилояти Мухтори Кӯҳистони Бадахшон ҳарорати миёнаи моҳонаи ҳаво дар ҳудуди меъёри иқлимӣ пешгӯӣ шуда, 10-12 дараҷа хунукиро ташкил медиҳад. Давоми моҳ тағйирёбии ҳарорати ҳаво пешгӯӣ шуда, шабона аз 3-8 то 10-15 дараҷа хунук, дар рӯзҳои алоҳида то 15-20 дараҷа хунук, рӯзона аз 2-7 то 0-5 дараҷа хунук, рӯзҳои алоҳида то 5-10 дараҷа хунукӣ дар назар дошта шудааст.

АКС: Дидор Саъдуллоев