Баъди навсозӣ дар Беморхонаи марказии ноҳияи Вахш шароити созгор ва мутобиқ ба стандартҳои ҷаҳонии табобат муҳайё шуд

ДУШАНБЕ, 16.12.2023. /АМИТ «Ховар»/. Минбаъд сокинони ноҳияҳои Кӯшониён, Ҷалолиддини Балхӣ ва шаҳри Бохтар имкон доранд барои гирифтани табобаб ба Беморхонаи марказии ноҳияи Вахш муроҷиат намоянд. Дар ин муассисаи тандурустӣ таҷҳизоти муосири тиббӣ аз давлатҳои Олмон, Ҷопон, Амрико, Испания, Италия ва Чин бо маблағи беш аз 15 миллион сомонӣ харидорӣ ва васлу насб шудааст. Аз ин баъд дар беморхонаи ноҳияи Вахш усулҳои замонавии ташхису муолиҷа ва ҷарроҳии ҳар гуна бемориҳо бо истифода аз таҷрибаи тибби давлатҳои пешрафта амалӣ мешавад, хабар медиҳад АМИТ «Ховар».

Дар беморхона дастгоҳҳои зарурии ҷарроҳӣ, оксигенераторҳо, рентгени рақамӣ, дастгоҳи ташхиси ултрасадо ва сабти барқии дил фароҳам оварда шудааст, ки қаблан табибон ба чунин таҷҳизоти замонавӣ ниёзи бештар доштанд. Фароҳам сохтани чунин шароити созгори ташхису муолиҷа ва таъминоти дастгоҳу васоили сохти замонавии тандурустӣ имкон фароҳам меорад, ки табибон ба сокинони ноҳияи Вахш ва дигар ноҳияҳои ҳамшафати он бо сатҳу сифати баланд хизмат расонанд.

Ёдовар мешавем, ки 15 декабр дар идомаи сафари корӣ Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Беморхонаи марказии ноҳияи Вахшро баъд аз таъмиру навсозӣ мавриди баҳрабардорӣ қарор доданд.

Беморхонаи марказии ноҳияи Вахш, ки аз калонтарин иншооти тандурустии ноҳия ва ҳудуди вилояти Хатлон дониста мешавад, бо дастгирии Ҳукумати Ҷумҳурии Тоҷикистон дар заминаи татбиқи лоиҳаи «Ҳифзи саломатии модару кӯдак ва беҳтар намудани самти ёрии таъҷилии тиббӣ дар ноҳияҳои вилояти Хатлон», марҳилаҳои 2 ва 4-ум мавриди таъмири асосӣ ва таҷдиду барқароркунӣ қарор дода шуд.

Бо навсозӣ ва муҷаҳҳазгардонии бинои асосии беморхона шароити созгор ва мутобиқ ба стандартҳои ҷаҳонии табобат муҳайё шуд.

АКС: Хадамоти матбуоти Президенти Ҷумҳурии Тоҷикистон/АМИТ «Ховар»