Бар асари заминларза дар шимолу ғарби Чин 111 нафар ба ҳалокат расиданд

ДУШАНБЕ, 19.12.2023 /АМИТ «Ховар»/. Бар асари заминларза дар музофоти Гансу ва Тсинхай беш аз 100 нафар ба ҳалокат расид. Тавре АМИТ «Ховар» бо истинод ба ТАСС хабар медиҳад, дар ин хусус Телевизиони марказии Чин иттилоъ додааст.

Теъдоди ҳалокшудагон дар Гансу ҳоло ба 100 нафар ва дар Тсинхай ба 11 нафар расидааст. Қаблан дар бораи беш аз 230 ҳалокшуда хабар расида буд. Раиси Ҷумҳурии Мардумии Чин Си Ҷинпин дастур дод, ки барои ҷустуҷӯ ва наҷоти мардум, инчунин рафъи оқибатҳои заминларза дар Гансу тамоми талошҳо ба харҷ дода шаванд, хабар медиҳад шабакаи телевизионӣ.

Амалиёти ҷустуҷӯию наҷотдиҳӣ бинобар шароити душвори метеорологӣ ва ҷуғрофӣ мураккаб мегардад. Шабона дар лаҳзаи заминларза ҳарорати ҳаво дар берун то -14 дараҷа поён фаромад. Ба гуфтаи ҳавошиносон, дар 10 рӯзи оянда дар минтақаи зилзила ҳаво рӯзона то 5 дараҷа гарм шуда, шабона то -14 дараҷа хунук мешавад. Баландии миёна аз сатҳи баҳр дар минтақаи кӯҳсоре, ки зилзила рух додааст, 2000 метрро ташкил медиҳад.

Дар ноҳияи мухтори Тсзшишан-Баоан-Дунсиан-Солори минтақаи мухтори музофоти Гансу нисфи шаб ба вақти Пекин заминларза бо шиддати то 6,2 дараҷа сабт шудааст, ки манбаи он дар умқи 10 километр ҷойгир будааст. Мақомоти Чин пас аз заминларза дар музофоти Гансу аз чор сатҳ дараҷаи дуюми вокуниши изтирорӣ ба заминларзаро ҷорӣ намуданд.

АКС аз манбаъҳои боз