Дар шаҳри Дубай павилиони «Об барои иқлим» ифтитоҳ гардид
ДУШАНБЕ, 01.12.2023 /АМИТ «Ховар»/. 1 декабр дар шаҳри Дубайи Амороти Муттаҳидаи Арабӣ дар ҳошияи Конфронси 28-уми тарафҳои Конвенсияи қолабии Созмони Милали Муттаҳид оид ба масъалаҳои тағйирёбии иқлим маросими ифтитоҳи павилиони «Об барои иқлим» баргузор гардид.
Павилиони «Об барои иқлим» бо мақсади баланд бардоштани сатҳи огоҳии ҷаҳонӣ дар бораи аҳамияти ҳамгироии масъалаҳои об ба рӯзномаи ҷаҳонии иқлим ва таҳкими масъалаҳои об дар ҳуҷҷатҳои расмии натиҷаҳои COP28 ташкил гардидааст.
Павилион садои ҷомеаи байналмилалии обро барои пешбурди минбаъдаи амнияти об, идоракунии оқилонаи об ва коҳиш додани хатари об ҳамчун ҳалли мушкилоти иқлим муттаҳид менамояд. Павилион имкон медиҳад, ки муносибати байни иштирокчиёни музокирот ва гурӯҳи тарафҳо дар гуфтушунидҳо расмӣ шавад, инчунин ба пешбурди минбаъдаи уҳдадориҳои иқлимӣ, ки дар Рӯзномаи амалиёти об пешбинӣ шудаанд, мусоидат намояд.
Дар маросими ифтитоҳи павилиони «Об барои иқлим» аз номи Асосгузори сулҳу ваҳдати миллӣ, Пешвои миллат – Президенти Ҷумҳурии Тоҷикистон муҳтарам Эмомалӣ Раҳмон Вазири энергетика ва захираҳои оби Ҷумҳурии Тоҷикистон Далер Ҷумъа иштирок ва суханронӣ намуд.
Дар маросими кушодашавии павилион инчунин Президенти Словения Наташа Пиртс-Мусар, аз номи Сарвазири Шоҳигарии Нидерланд Марк Рютте — Шоҳзода Хайме Бернардо Бурбон-Парма, Вазири хоҷагии об ва ирригатсияи Миср Хани Севилам ва дигар шахсони олимартаба иштирок доштанд.
Дар доираи COP28 дар Павилиони об бисёр чорабиниҳо, вохӯриҳо ва гуфтушунидҳо доир гардида, дар онҳо ба масъалаҳои об афзалият дода мешавад, то ки нақши он дар ноил шудан ба тобоварии иқлим бештар намоён гардад.
Ёдовар мешавем, ки 30 ноябр дар шаҳри Дубайи Амороти Муттаҳидаи Арабӣ Конфронси 28-уми тарафҳои Конвенсияи қолабии Созмони Милали Муттаҳид оид ба масъалаҳои тағйирёбии иқлим (СОР28) оғоз гардида, то 12 декабр идома меёбад. Ҷумҳурии Тоҷикистон ва Шоҳигарии Нидерланд дар якҷоягӣ бо Амороти Муттаҳидаи Арабӣ дар мавзуъҳои об чорабиниҳои гуногун, аз ҷумла ҷаласаҳои пленарӣ, ҳамоишҳо, ҷаласаҳои сатҳи баланд, павилионҳо ва вохӯриҳо ташкил ва баргузор менамоянд.
САҲМИ ПРЕЗИДЕНТИ ТОҶИКИСТОН ДАР ҲАЛЛИ МУШКИЛОТИ ҶАҲОНИИ ЭКОЛОГӢ: аз обу иқлим то зеҳни сунъӣ. Андешаҳо дар ин маврид
Маҷмаи Умумии Созмони Милали Муттаҳид оид ба ҷузъиёти баргузории Конфронси оби СММ-2028 дар Душанбе қатънома қабул намуд
Бо ташаббуси Тоҷикистон СММ 31 августро Рӯзи байналмилалии зеҳни сунъии бехатар, ҳифзшуда ва боэътимод эълон намуд
Антониу Гутерриш: «Тоҷикистон дар пешбурди рӯзномаи байналмилалӣ оид ба масъалаҳои об ва пиряхҳо нақши пешсаф дорад»
Оид ба ташаббусҳои глобалии Тоҷикистон дар соҳаи ҳифзи пиряхҳо конфронси илмии ҷумҳуриявӣ доир шуд
Пиряхҳоро аз обшавӣ бояд ҳифз намуд, — бардошт аз конфронси байналмилалии илмӣ-амалӣ дар Душанбе
ҶОИЗАИ БАЙНАЛМИЛАЛИИ ПРЕЗИДЕНТИ ТОҶИКИСТОН ДАР СОҲАИ ОБ–ВАСИЛАИ ТАҲКИМИ ДИПЛОМАТИЯИ ОБ ДАР ҶАҲОН. Андешаҳо дар ин маврид
Доир ба ташаббусҳои Тоҷикистон дар самти обу иқлим конфронси илмӣ-амалӣ баргузор шуд
Ташаббуси Тоҷикистон дар СММ: масъулияти байнинаслӣ ҳамчун парадигмаи нави ҳуқуқи сулҳ. Андешаҳо дар ин маврид
Доир ба Даҳсолаи байналмилалӣ оид ба таҳкими сулҳ барои наслҳои оянда дар Ҳисор ҳамоиш баргузор шуд
