ДАРАХТ БИНШОН! Дар шоҳроҳи Душанбе — Турсунзода 500 бех ниҳоли ҳамешасабз шинонида шуд

ДУШАНБЕ, 19.12.2023 /АМИТ «Ховар»/. Бо мақсади саҳмгузорӣ дар ободонии маҳал дар шаҳри Турсунзода маъракаи «Як рӯзи ниҳолшинонӣ» баргузор гардид, ки дар он 500 бех ниҳолони ҳамешасабз аз тарафи аҳли ҷамоатҳои деҳот дар шоҳроҳи Душанбе — Турсунзода шинонида шуданд, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии шаҳри Турсунзода.

Ҳамзамон маъракаи ниҳолшинонӣ аз ҷониби сокинони Ҷамоати деҳоти Сешанбеи шаҳр идома дорад.  Сокинони заҳматпешаву ободгари шаҳри Турсунзода минбаъд низ ният доранд, ки бо шинонидани ниҳолҳои ороишиву ҳамешасабз, гулу буттаҳо ва тоза намудани атрофи корхонаву муассисаҳо ва хонаҳои истиқоматӣ дар ободии диёр саҳм гузоранд.

Тибқи иттилои мутахассисон, дар шароити Тоҷикистон асосан се давраи ниҳолшинонӣ:  тирамоҳ, зимистон ва аввали  баҳор мавҷуд аст.

Ба гуфтаи олимони соҳа, дар фасли зимистон ниҳол шинонидан беҳтар аз он аст, ки дар фасли баҳор ва тирамоҳ  шинонем.  Чунки ниҳоли шинонидаи мо оҳиста-оҳиста ба шароити ҳамон минтақа мутобиқ шуда, то фарорасии фасли баҳор ба нашъунамо оғоз менамояд.

АКС: Мақомоти иҷроияи ҳокимияти давлатии шаҳри Турсунзода