«Шаббода»-и адиб Иззатбек Идизода ғолиби озмуни «Китоби сол -2023» гардид

Декабрь 3, 2023 14:00

ДУШАНБЕ, 03.12.2023 /АМИТ «Ховар»/. Тавре қаблан хабар додем, 29 ноябр дар Вазорати фарҳанги Ҷумҳурии Тоҷикистон Озмуни ҷумҳуриявии «Китоби сол-2023» ҷамъбаст гардида, ғолибони он муайян шуданд. Дар бахши китоби назм асари «Шаббода»-и Иззатбек Идизода (нашриёти «Адиб») ғолиби озмун дониста шуд.

Адиб дар суҳбат бо хабарнигори АМИТ «Ховар» иброз дошт, ки китоби «Шаббода» осори мунтахаби ӯ буда, аз бобҳои «Меҳри диёр», «Гулу гиря» ва мақолаҳои гуногун иборат мебошад.

Ҳамзамон адиб шеърҳои зиёди баландмазмун эҷод намуда, ба муносибати 30-солагии Истиқлолияти давлатии Ҷумҳурии Тоҷикистон шеърҳои ватандӯстонааш дар озмуни Иттифоқи нависандагон ҷои аввалро гирифтанд.

Бояд гуфт, ки адиб аз соли 2003 узви Иттифоқи нависандагони Тоҷикистон буда, 15 декабри соли равон дар Иттифоқи нависандагон базми ширу шакари ӯ бо иштироки овозхононе, ки ашъорашро сароидаанд, баргузор мегардад.

Иззатбек Идизода 15 декабри соли 1953 дар ноҳияи Комсомолобод (имрӯза Нуробод) чашм ба олам кушодааст. Баъди хатми мактаби миёна соли 1971 ба факултаи филологияи Университети давлатии Тоҷикистон (ҳозира Донишгоҳи миллии Тоҷикистон) дохил шуда, онро соли 1976 хатм намудааст.

Муддате ба ҳайси котиби масъули рӯзномаи ноҳиявии «Ҳақиқати Комсомолобод», котиби масъули Ҷамъияти «Дониш»-и ноҳия ва муҳаррири варзидаи идораи «Ахбор»-и Радиои Тоҷикистон, ҷонишини сармуҳаррири ҳафтаномаи «Қонун ва ҷомеа» ва баъдан мудири шуъбаи ҳафтаномаи «Тоҷикистон» кор кардааст.

Шеъру мақола ва очерку лавҳаҳояш аз солҳои ҳафтодуми асри гузашта дар саҳифаҳои рӯзномаву маҷаллаҳои ҷумҳурӣ ба табъ мерасанд.

Гулчини офаридаҳояш дар беш аз 10 маҷмуаи дастҷамъӣ ва китобҳои «Ба ҷӯи нав об омад» (1981), «Шаббода» (1989), «Духтари шаб» (2003) ва «Як гули садбарг» (2014) пешкаши ҳаводорони каломи бадеъ гардидааст.

Инчунин чанде аз навиштаҳояш ба забонҳои русиву узбекӣ ва англисӣ тарҷума ва чоп шудаанд.

Дар айни замон ӯ китоберо бо номи «Дар лаби чашма» бо се забон омодаи чоп намудааст, ки рӯзҳои наздик дастраси хонандагон мегардад.

София ШОИК,
АМИТ «Ховар»

АКС: Вазорати фарҳанги Ҷумҳурии Тоҷикистон

Декабрь 3, 2023 14:00

Хабарҳои дигари ин бахш

Ба Ҷоизаи сулҳи Нобел дар соли 2024 285 номзад пешниҳод гардид
Имрӯз дар Душанбе сардии ҳаво ба 2 дараҷа мерасад
Байни донишҷӯдухтарони Донишгоҳи давлатии ҳуқуқ, бизнес ва сиёсати Тоҷикистон мусобиқаҳои варзишӣ оғоз ёфтанд
Сӯхтори ҷангал дар Техас дар таърихи мушоҳидаҳои иёлат дуюмин бузургтарин гардид
Созмони Милали Муттаҳид барои кумак ба Эфиопияи шимолӣ, ки аз хушксолӣ зарар дидааст, 17 миллион доллари ИМА ҷудо намуд
Обу ҳавои номусоид ва обхезӣ сабаби маҳдудияти ҳаракати нақлиёт дар Испания гардид
Имрӯз дар Тоҷикистон борону барф меборад
Иттиҳоди Аврупо ҷазо барои ҷиноятҳои экологиро сахттар намудааст
Таваллуд дар Ҷопон соли 2023 ба сатҳи рекордӣ коҳиш ёфт
Имрӯз дар Тоҷикистон ҳавои тағйирёбанда шуда, туман мефарояд
ДАРАХТ БИНШОН! Дар шаҳри Турсунзода беш аз 350 бех ниҳоли арча шинонида шуд
Дар шарқи Туркия дар кон фурӯрезии ҷинсҳои кӯҳӣ ба амал омад