ДАРАХТ БИНШОН! Дар деҳаи Мингичари ноҳияи Рӯдакӣ ва теппаҳои шафати шоҳроҳи Душанбе-Ваҳдат зиёда аз 600 бех ниҳоли гуногун шинонида шуд

РӮДАКӢ, 08.01.2024 /АМИТ «Ховар»/. Дар шафати шоҳроҳи Душанбе-Ваҳдат, дар  ҳудуди маъмурии ноҳияи Рӯдакӣ ва  дар деҳаи Мингичари ҷамоати деҳоти Лоҳур  маъракаи ниҳолшинонӣ баргузор ва дар рӯзи аввал  зиёда аз 600 бех ниҳоли мевадиҳандаю ороишӣ ва ҳамешасабз шинонда шуд. Дар ин хусус  ба хабарнигори минтақавии АМИТ «Ховар» Субҳониддини Маҳмуд дар Мақомоти иҷроияи ҳокимияти давлатии ноҳияи Рӯдакӣ иттилоъ доданд.

Мувофиқи нақшаи пешбинишуда, бояд дар масоҳати  16 гектар заминҳои талу теппаи шафати шоҳроҳи Душанбе — Ваҳдат ниҳолҳои ҳамешасабз, ороишӣ ва мевадиҳанда шинонида шаванд. Дар маъракаи ниҳолшинонӣ мутахассисони Институти боғдории Академияи илмҳои кишоварзии Ҷумҳурии Тоҷикистон иштирок намуда, оид ба технологияи шинонидани дарахтон маслиҳатҳои муфид доданд.

Ҳамчунин ба  масъулин ҷиҳати нигоҳубини дурусти ниҳолҳои шинонида ва таъмини нашъунамои дурусти онҳо дастурҳои мушаххас дода шуданд.

Тасмим гирифта шуд, ки дар талу теппаҳои бекорхобидаи ҳудуди деҳаи Мингичар ва атрофи он  маъракаи ниҳолшинонӣ идома ёфта, ниҳолҳои мевадиҳанда ва ҳамешасабз шинонида шаванд.

Шинонидани дарахт, нигоҳубин ва парвариши он чун анъана ва суннати нек пазируфта шуда, кори савоб ва дар ин баробар амали барои табиат фоидаовар маҳсуб мешавад. Дар шароити тағйирёбии иқлим барои нигоҳ доштани мувозинати табиат шинонидани дарахтон амри зарурӣ дониста мешавад.

Пешвои миллат муҳтарам Эмомалӣ Раҳмон ба масъалаи парвариши дарахтон, бунёди боғҳо ва хуррам гардонидани ҳар гӯшаи мамлакат пайваста таваҷҷуҳ зоҳир намуда, ба масъулин дастур медиҳанд, ки бо ин амали хайр мамлакатро ободу зебо ва сарсабз намоянд.

АКС: Мақомоти иҷроияи ҳокимияти давлатии ноҳияи Рӯдакӣ