ФАРОҒАТУ ТАБОБАТ ДАР «ЗУМРАД». Муассисаҳои санаториву курортии Тоҷикистон барои истироҳати меҳмонону сайёҳон омода мебошанд

Январь 7, 2024 16:12

ДУШАНБЕ, 07.01.2024 /АМИТ «Ховар»/. Тавре қаблан иттилоъ додем, дар Ҷумҳурии Тоҷикистон муассисаҳои санаториву курортӣ, новобаста аз шакли моликият фаъолият доранд. Ин осоишгоҳҳо барои истироҳати меҳмонону сайёҳони дохиливу хориҷӣ шароити мусоиди ҳам истироҳат ва ҳам табобат фароҳам меоранд. 

Ин навбат АМИТ «Ховар» бо истинод ба Федератсияи иттифоқҳои касабаи мустақили Тоҷикистон доир ба осоишгоҳҳое, ки дар вилояти Суғд ҷойгир мебошанд, маълумот пешниҳод менамояд.

Осоишгоҳи «Шифо» дар шаҳри Гулистони вилояти Суғд ҷойгир аст. Осоишгоҳро истироҳаткунандагон ва сайёҳон ҳамчун макони табобату истироҳат қарор дода, ба он  аз ҷиҳати ҳолати хуби  санитарию беҳдоштӣ баҳои баланд медиҳанд.

Дар  шаҳри Гулистони вилояти Суғд инчунин осоишгоҳи Ҷамъияти дорои масъулияти маҳдуди «Соҳил»  ҷойгир мебошад, ки он низ чун  макони табобату истироҳат шинохта шудааст.

Ҷамъияти саҳомии осоишгоҳи «Зумрад» яке аз маъруфтарин осоишгоҳҳои ҷумҳурӣ буда,  дар кӯчаи Собитов 200-и шаҳри Исфараи вилояти Суғд ҷойгир аст.

Дар ин осоишгоҳ ҳамасола  шаҳрвандони ҷумҳурӣ  ва  хориҷ аз давлатамон низ саломатиашонро барқарор менамоянд ва аз табиати зебои он баҳра мебардоранд.

Бояд гуфт, ки осоишгоҳи «Зумрад» дар масофаи 3 км аз маркази шаҳри Исфара, 110 км аз маркази вилоят- шаҳри Хуҷанд, дар соҳили дарёчаи Исфара, қисми ҷанубу ғарби водии Фарғона ва дар домани қаторкӯҳҳои Туркистон, дар баландии 940 метр аз сатҳи баҳр ҷойгир шудааст.

Иқлими табобатии «Зумрад» дар табобати бисёр бемориҳо нақши  хосса дорад. Зумрад (шакли дурусти талаффузаш Зумуррад)- санги қиматбаҳои ҷилодор буда, хосияти муолиҷавӣ дорад. Оби маъдандори «Шифо» яке аз неъматҳои босамар истифодашаванда дар ин осоишгоҳ мебошад.

Ташхиси ин оби дармонбахш дар санҷишгоҳҳои «Средазгеоминвод», пажуҳишгоҳҳои илмию тадқиқотии курортология ва физиотерапияи шаҳрҳои Тошканду Москва анҷом пазируфта, натиҷаҳои дилхоҳ додааст. Таҳқиқот дар ин замина таркиби бойи ин обро исбот намуд ва ба ин васила имконият фароҳам омад, ки ин оби маъданӣ барои табобати бемориҳои дилу рагҳои хунгард, системаи асаб, узвҳои такяву ҳаракат, таносули занона, пӯст ва вайроншавии мубодилаи моддаҳо ба таври васеъ мавриди истифода қарор гирад.

Ҳудуди умумии осоишгоҳ 20 гектар буда, онро буттаҳою дарахтони нодири ороишию мевадиҳанда, гулу гулбуттаҳо ороиш медиҳанд.

Умед аст, ки осоишгоҳи «Зумрад» боз ҳам ободтару дилработар гардида, ба маркази дӯстдоштаи табобативу фароғатӣ ва сайёҳӣ мубаддал мешавад.

София ШОИК,
АМИТ «Ховар»

АКС аз манбаъҳои боз

Январь 7, 2024 16:12

Хабарҳои дигари ин бахш

НАЗАРИ КОРШИНОС. Эҳёи ҳунарҳои мардумӣ ба зиёд гардидани соҳибкории хурд ва баланд шудани некӯаҳволии мардум мусоидат менамояд
Донишҷӯёни Донишгоҳи байналмилалии сайёҳӣ ва соҳибкории Тоҷикистон ба Донишгоҳи давлатии фарҳанги Қазон фиристода шуданд
МАСЛИҲАТИ МУТАХАССИС. Лимӯ давои бемориҳои онкологӣ, фишорбаландӣ, рӯдаю меъда ва асаб мебошад
ОГОҲӢ. Дар Тоҷикистон то 4 март хатари лағзиши тарма боқӣ мемонад
«Бояд дар амал, бо анҷоми хизматҳои шоиста ба манфиати халқу Ватан ватандӯстии хешро собит созем»,- бардошт аз ҳамоиш дар Кумитаи кор бо ҷавонон ва варзиш
Дар минтақаи Краснодари Федератсияи Русия Фестивали ҷаҳонии ҷавонон оғоз гардид
«ОИЛАИ НАМУНАВӢ». Таҳти ин унвон дар Тоҷикистон озмуни ҷумҳуриявӣ баргузор мегардад
«ДАСТИ ДУОИ МОДАР». Дар Душанбе бо иштироки занон-ходимони давлатӣ, фаъолони арсаи сиёсату ҷомеа ва собиқадорони меҳнат ҳамоиши идона доир гардид
Дар моҳи март сокинони Тоҷикистонро чӣ гуна ҳаво интизор аст?
ИЛМ ВА ЗАМОН. Рушди фанҳои табиатшиносӣ, дақиқ ва риёзӣ дар меҳвари таваҷҷуҳи ҷомеаи Тоҷикистон қарор дорад
1 МАРТ-РӮЗИ ҶАҲОНИИ МУДОФИАИ ГРАЖДАНӢ. Тоҷикистон соли 2016 узви Созмони байналмилалии мудофиаи гражданӣ гардид
БАҲОРИ ПУРБАРФ МУБОРАК! Имрӯз рӯзи аввали баҳор — фасли эҳё ва оғози кишту кор аст