Президенти Тоҷикистон: «Агар мо низоми энергетикиро таҷдид наменамудем, шояд имрӯз тамоман бе барқ мемондем»

ДУШАНБЕ, 01.01.2024 /АМИТ «Ховар»/. Дар замони соҳибистиқлолӣ аз ҷониби Ҳукумати Тоҷикистон барои навсозӣ, яъне таъмиру таҷдиди низоми энергетикии мамлакат 85,7 миллиард сомонӣ равона шудааст. Низоме, ки дар 75 соли замони гузашта муҳлати истифодаи аксари таҷҳизоти он қариб, ки ба анҷом расида буд, таҷдиду навсозӣ шуд. Агар мо ин корро намекардем, шояд имрӯз умуман бе барқ мемондем. Ин нукта 28 декабри соли 2023 зимни пешниҳоди Паёми  Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилию хориҷии ҷумҳурӣ» баён гардид.

Бояд гуфт, ки солҳои охир рушди бомароми соҳаи энергетика ба раванди саноатикунонии босуръати мамлакат заминаи мусоид фароҳам меоварад.

Дар ин давра танҳо барои навсозии неругоҳҳои барқи обии амалкунанда беш аз 11,3 миллиард сомонӣ равона гардида, неругоҳи барқи обии «Сарбанд» пурра таҷдид ва иқтидори он 30 мегаватт зиёд а шуд.

Инчунин таҷдиди неругоҳҳои «Норак» ва «Қайроққум» бомаром идома дошта, баъди ба анҷом расидани корҳо иқтидори онҳо дар маҷмуъ, 423 мегаватт афзоиш меёбад.

Нуктаи муҳим ин аст, ки ин неругоҳҳо баъди навсозӣ ба мардуми Тоҷикистон боз даҳсолаҳои дигар хизмат менамоянд.

Ҳукумати мамлакат бо назардошти фаровонии захираҳои гидроэнергетикӣ, иқтидори бузурги истеҳсоли энергияи «сабз» ва содироти он, дар ҷодаи ноил гардидан ба ҳадафи стратегии худ – расидан ба истиқлоли энергетикӣ қадамҳои устувор гузошта истодааст.

Соли 2023 иқтидори энергетикии Тоҷикистон зиёда аз 6 ҳазор мегаватт ва истеҳсоли неруи барқ 22 миллиард киловатт – соатро ташкил дод, ки нисбат ба соли 2017-ум 4,8 миллиард киловатт – соат ё 28 фоиз зиёд мебошад.

АКС: АМИТ «Ховар»