Ҳамкории Донишгоҳи техникии Тоҷикистон ва Донишгоҳи миллии АвруОсиё ба номи Л.Н. Гумилёв густариш меёбад

ДУШАНБЕ, 02.02.2024 /АМИТ «Ховар»/. Зимни мулоқоти маҷозии роҳбарияти Донишгоҳи техникии Тоҷикистон ба номи академик Муҳаммад Осимӣ ва намояндагони Донишгоҳи миллии АвруОсиё ба номи Л.Н. Гумилёви Қазоқистон масоили марбут ба фаъолияти факултети муштараки байналмилалии технологияҳои иттилоотӣ мавриди баррасӣ қарор дода шуд. Дар ин хусус ба АМИТ «Ховар» дар Донишгоҳи техникии Тоҷикистон хабар доданд.

Дар мулоқот ҷонибҳо атрофи мубодилаи академӣ, ҳамкории илмӣ ва мустаҳкам намудани заминаи ҳуқуқии ҳамкорӣ байни ин ду донишгоҳ  ибрози назар намуданд.

Ҳоло ҷиҳати иҷрои муқаррароти нақшаи чорабиниҳо аз натиҷаи сафари давлатии Президенти Ҷумҳурии Тоҷикистон ба Ҷумҳурии Қазоқистон дар таърихи 3-4 майи соли 2023 дар заминаи Донишгоҳи техникии Тоҷикистон факултети муштараки байналмилалии технологияҳои иттилоотии Донишгоҳи миллии АвруОсиё ба номи Л.Н. Гумилёв аз рӯйи ихтисосҳои «информатика (самти омӯзгорӣ)», «маъмурикунонӣ, идора ва ҳифзи системаҳо ва шабакаҳои компютерӣ дар корхонаҳо» ва «системаҳои бехатарии иттилоотӣ» таъсис дода шудааст.

Инчунин дар ҷараёни баргузории Форуми дуюми ректорони муассисаҳои таҳсилоти олии касбии давлатҳои Осиёи Марказӣ 13-14 сентябри соли 2023 байни Донишгоҳи техникии Тоҷикистон ба номи академик Муҳаммад Осимӣ ва Донишгоҳи миллии АвруОсиё ба номи Л.Н. Гумилёв оид ба таъсиси факултети муштарак созишномаи ҳамкорӣ ба имзо расонида шуд.

АКС: Донишгоҳи техникии Тоҷикистон ба номи академик Муҳаммад Осимӣ