Вазорати корҳои дохилӣ: «Ду соли охир Тоҷикистон аз ҷониби созмонҳои байналмилалӣ дар қатори давлатҳои амнтарини дунё эътироф мешавад»
ДУШАНБЕ, 15.02.2024 /АМИТ «Ховар»/. Вазорати корҳои дохилии Тоҷикистон пайваста фаъолиятро дар доираи тадбирҳои пешгирӣ, ошкоркунӣ, бартарафкунӣ, фошсозӣ ва тафтиши ҷиноятҳо пеш мебарад. Ҳамин аст, ки давоми ду соли охир созмонҳои мустақил ва беғарази байналмилалӣ Тоҷикистонро дар қатори давлатҳои амнтарини дунё эътироф намудаанд. Дар ин хусус Вазири корҳои дохилии Ҷумҳурии Тоҷикистон, генерал-полковники милитсия Рамазон Раҳимзода имрӯз зимни нишасти матбуотӣ оид ба натитҷаҳои фаъолияти оперативӣ-хизматии мақомоти корҳои дохилӣ дар соли 2023 ба хабарнигорон иттилоъ дод.
Рамазон Раҳимзода иттилоъ дод, ки давоми соли 2023 дар ҳудуди Тоҷикистон 57 ҷинояти одамкушӣ ва суиқасд ба одамкушӣ, 19 ҷинояти роҳзанӣ, 107 ҷинояти ғоратгарӣ, 47 ҷинояти таҷовуз ба номус, 129 ҷинояти қасдан расонидани зарари вазнин ба саломатӣ, 1 ҳазору 414 ҷинояти авбошӣ, 2 ҳазору 762 ҷинояти қаллобӣ ва дигар ҷиноятҳои марбут ба дуздӣ, ғайриқонунӣ нигоҳ доштан ва тайёр намудани силоҳ, тамаъҷӯӣ, муомилот, нигоҳ доштан ва интиқоли маводи нашъадор сабт шудааст.
Иброз гардид, ки кормандони Вазорати корҳои дохилӣ фаъолияти шабонарӯзиро ба таъмини муҳофизати тартиботи ҷамъиятӣ, бехатарии зиддисӯхторӣ, бехатарии ҳаракат дар роҳ, ҳимояи ҳаёт ва саломатӣ, ҳуқуқу озодиҳои инсон ва шаҳрвандон аз кирдорҳои ғайриқонунӣ, ҳимояи манфиатҳои ҷамъиятию давлатӣ равона намудаанд.
Дар нишаст гуфта шуд, ки соли 2023 аз тарафи мақомоти корҳои дохилӣ 11 гурӯҳи муташаккили ҷиноятӣ дар ҳайати 55 нафар барои содир намудани 43 ҷиноят ошкор шуд. Дар натиҷаи гузаронидани корҳои фаврӣ-ҷустуҷӯӣ 316 силоҳи оташфишон ошкор ва мусодира гардид.
Агарчӣ нисбат ба соли 2022 шумораи ҷиноятҳои содиршуда аз тарафи ноболиғон ва ҷавонон камтар шуда бошад ҳам, мутаассифона, чунин ҳолатҳо ҳоло ҳам ба назар мерасанд. Соли 2023 аз тарафи ноболиғон содиршавии 555 ҷиноят ва аз тарафи ҷавонон 3020 ҷиноят сабт шудааст.
Бинобар риоя нагардидани қойидаҳои ҳаракати роҳ дар ҳудуди мамлакат 1 ҳазору 111 садамаи нақлиётӣ ба амал омада, 519 нафар ба ҳалокат расида, 1 ҳазору 179 нафар ҷароҳати ҷисмонӣ гирифтаанд.
Ҳамчунин соли 2023 1 ҳазору 236 ҳодисаи сӯхтор рӯй дода, 23 шаҳрванд фавтидаанд. Маблағи зарар аз сӯхтор 47 миллиону 861 ҳазор сомониро ташкил медиҳад.
Акрам САНГЗОДА,
АМИТ «Ховар»
АКС: АМИТ «Ховар»
РӮЗИ КОРМАНДОНИ МАҚОМОТИ НАЗОРАТИ МАВОДИ НАШЪАОВАР. Ба ин муносибат ҷаласаи тантанавӣ баргузор гардид
Таҳти унвони «Нақши зеҳни сунъӣ дар рушди Қувваҳои Мусаллаҳ» конференсияи ҷумҳуриявии илмӣ-ҳарбӣ доир шуд
Раёсати ВКД дар вилояти Хатлон: «Таътили тобистона бояд ба давраи тарбия, донишандӯзӣ ва истироҳати солим табдил ёбад»
Юсуф Раҳмон дар Форуми байналмилалии амният ва Вохӯрии байналмилалии намояндагони воломақом иштирок намуд
РӮЗИ ҚӮШУНҲОИ САРҲАДӢ. Афсарону сарбозони ин ниҳод рисолати фарзандии худро дар назди Ватан – Модар ва халқу давлат бо сарбаландӣ адо менамоянд
Котиби Шурои амнияти Тоҷикистон дар Вохӯрии котибони шуроҳои амният дар қолаби «Осиёи Марказӣ – Русия» иштирок намуд
Юсуф Раҳмон дар ҷаласаи Кумитаи котибони шуроҳои амнияти Созмони Аҳдномаи амнияти дастҷамъӣ иштирок намуд
Дар Тоҷикистон нақшаи даъвати баҳорӣ ба сафи Қувваҳои Мусаллаҳ 100 фоиз иҷро шуд
Оид ба Стратегияи пешгирии экстремизм ва терроризм дар Тоҷикистон вохӯрӣ баргузор гардид
Дар Душанбе масоили муқовимат ба ҷинояткорӣ дар замони муосир баррасӣ шуд
Намояндаи Тоҷикистон татбиқи Стратегияи миллӣ оид ба назорати маводи нашъаоварро дар ҷаласаи СҲШ муаррифӣ намуд
Ҳабибулло Воҳидзода бо аъзои иттиҳодияи ҷамъиятии «Пайравони Пешвои миллат» вохӯрӣ намуд
